賣地前夕，地產股不跌反升。名牌專家睇淡賣地成績，地產股仍然硬淨，賣完地之後，地產股可能會彈彈跳，除非賣地成績真係好差。但大型地產商都驚驚哋唔多夠土地儲備，佢哋又點會唔舉手搶地？賣地成績又點會差得去邊？
地產C輪：富貴輪中求，買地產C輪短炒。長實C輪例牌揀2249，最爆炸嘅唔係佢，溢價最離譜嘅唔係佢，1日50球轉手易買貨易投降，有關數據載於走勢圖內。長實C輪9227數據都唔錯，不過得1.3球易手，唔啱炒。
新地C輪：2165係理想對象之一，明年1月到期，輪價77仙，溢價1.3%，槓桿率9.7倍（有效7.2倍），引伸波幅26.6%。想爆炸力大啲，揀2252，明年2月到期，輪價49.5仙，溢價5.6%，槓桿率15.1倍（有效8.1倍），引伸波幅28.4%。
恒地C輪：正路之選係9038，年底到期，輪價36.5仙，溢價2%，槓桿率10.4倍（有效7.2倍），引伸波幅33.3%。
至於新世界C輪，似乎冇乜隻揀得落手，9667交投唔錯，但若然正股牛皮，隻輪輸溢價都輸到暈。
滙控C輪：滙控（005）收126元，升50仙，好多滙控C輪都微有進帳，10份輪兌1股正股，啲輪升2-3仙都好應該。
滙控C輪4441就係冇郁嗰隻，收54仙，就買呢隻。隻輪明年6月到期，壽命夠晒長，溢價2.6%，槓桿率23.3倍，實際槓桿率11.8倍勁爆炸，引伸波幅13.8%勁低。淨係博引伸波幅大番啲，已經着數。
章盛