澳門賭業概念持續熱炒，新濠國際（200）噚日一度炒過上最高7.70元，晏晝先至回軟，收市報6.20元，升8.77%，反映市場仍然有唔少資金睇好澳門賭業，呢個炒作概念方興未艾，睇嚟重有排玩。
細佬掂之外，家姐主理的信德集團（242）亦唔弱，一度炒過上去最高5元，收4.80元，仍升6.08%。雖然信德氣勢好似唔夠新濠勁，但經紀陳唔講小初都冇留意，原來信德股價已升上一年新高。
經紀陳噚日向小初推介一隻冷門股新創綜合企業（1141），佢話此股前身係雄豐，數年前重組引入現時的新大股東，但一直冇乜動作，不過近排明顯轉趨高調，最新計劃係可能會利用東莞廠房空置土地，發展為物流中心。
除見報多咗，經紀陳話新創近日亦見過唔少證券界人士，據聞有人搵到證券界高手相助，睇嚟將有動作，不妨留意走勢，但首先講明風險唔細。
新創噚日升13.33%，收8.5仙，成交股數3228萬股，金額259.85萬元。
慕容小初