憑妻貴變意國人 順便「慳位」<br>球驗客手記:大哨恨攞皇馬千萬

憑妻貴變意國人 順便「慳位」
球驗客手記:大哨恨攞皇馬千萬

喺出年一月,巴西前鋒「哨牙仔」朗拿度就會同巴西模特兒未婚妻施卡莉妮結婚,而好多人都話施卡莉妮唔單止樣靚身材正,重腳頭好好㖭!因為自從朗拿度同佢拍拖之後,球場上表現唔錯,身形重弗咗唔少。
據我求大俠所知,施卡莉妮真係好「旺夫」,朗拿度同佢結婚,就會穩執一百萬歐元(約九百六十七萬港元)。點解?原來施卡莉妮係意大利裔,佢嘅爺爺同嫲嫲都喺意大利出世,雖然𠵱家施卡莉妮重未攞意大利護照,不過朗拿度講明結咗婚後佢會立即叫施卡莉妮申請意大利護照;咁佢就可以「夫憑妻貴」,攞埋意大利護照,成為歐盟球員。
朗拿度話:「雖然我冇因為唔係歐盟球員而遇到問題,不過出年結咗婚之後,我就會有意大利護照,幫皇馬慳咗個非歐盟球員位。喺隊友卡路士成功申請西班牙護照後,皇馬畀一百萬歐元佢做獎勵,如果佢哋都畀一百萬我,我梗係高興啦!」

虔誠齋戒冇力慣晒尼比特搵熱刺較飛?
回教嘅齋月就快到,好多信回教嘅足球員為免齋戒影響體力同表現,會自行喺暑假守齋算數。不過,熱刺嘅摩洛哥中堅尼比特就話唔會咁做;作為虔誠嘅回教徒,佢話自己多年嚟都係一邊守齋一邊比賽,重話連影響表現都在所不計。照尼比特咁講,熱刺後防咪隨時可能有危機?

小腿暗傷差啲早唞古利勁踩巴塞軍醫
西甲聯勁旅巴塞隆拿今屆表現好好,但最近傳出法國中場古利唔俾巴塞嘅軍醫醫腳。喺古利上周歸法國隊備戰世界盃外圍賽時,法國軍醫發現佢小腿有傷,唔及早治理可能要唞幾個月。古利話巴塞嘅軍醫一直檢查唔到佢小腿有事,所以對佢哋失晒信心,一於唔俾佢哋掂佢隻腳!

欽點鐵腳柏加嗌走摩連奴𠱁番咪過信
自從車路士領隊摩連奴公開數名球員肯定獲正選位置後,英格蘭中場柏加便希望離隊他投。摩連奴日前又話會畀柏加及格連莊臣上陣機會,但要努力練習。我求大俠就覺得摩連奴唔應該公開正選球員個名,重要成六個;「車仔」咁多球員,怕且柏加同格連莊臣有得上陣都唔慌多啦。

轉會AC後備都冇份多拉素生日唔快樂
噚日係AC米蘭中場多拉素三十一歲「牛一」,但佢生日前夕就話唔多高興,埋怨轉會後冇機會上陣。呢位仁兄今季響意甲未落過場不特止,慘到個名連後備名單都未上過;但正所謂食得鹹魚抵得渴,佢踢咁多年波,決定加盟呢隊咁齊章嘅班霸前,冇理由預計唔到咁嘅情況。