美國女歌手BritneySpears上月中突然同舞蹈員KevinFederline提早兩個月結婚，俾個精神科醫生話佢情緒失控之外，又俾人傳Britney其實係奉子成婚，雖然佢一直否認，不過前兩日Britney去美容院嗰陣，有人發現佢個肚腩明顯隆起。
Britney上星期五一個人走去洛杉磯一間美容院諗住去曬太陽燈，愈嚟愈不修邊幅嘅佢，當日出街時塊面重搽住一撻撻嘅暗瘡膏，但唔少人仍然一眼認出呢個師奶就係Britney。而最搶眼嘅，當然就係佢凸咗出嚟嘅大肚腩，十足十有咗一樣。
不過咁都未算奇，身為百事代言人嘅Britney，居然公然揸住罐可口可樂，擺到明豁出去，一副唔想撈嘅樣，我羅拉都冇眼睇。
另外，Britney喺稍後推出嘅精選大碟封面度，着住一件皮草影相，惹嚟動物權益組織PeTA批評，不過佢就一於少理，梗係啦！Britney近日重享受緊新婚生活，日前佢重同老公Kevin齊齊去買床上用品，不過佢兩個似乎對枕頭套嘅顏色有啲分歧，重企喺人哋間舖頭度霎氣，真係有生活情趣。