我曾替某機構擔任類似創作顧問的工作，每月開一次例會，老闆及各部門主管均需列席，議程的次序是各部門先滙報狀況，提出問題，解決問題，最後展望未來及定出目標。
深圳廠的港方廠長：「深圳廠內道具及服裝堆積如山，應盡快整理。」「已在進行中，但大部份道具及服裝均已殘缺不堪，不知整理後有何用處？」中方廠長答道。「還有，廠內之廁所衞生條件奇差，惡臭中人欲嘔，根本不能忍受，應盡快改善。」港方廠長說。「唔係呀？個廁所每日都有人定時清潔，好乾淨，乾淨到咩咁！」中方廠長突然講起廣東話來。「有冇搞錯，咁都叫做乾淨？臭到嘔呀大佬！」反而港方廠長情急之下用普通話口音講起廣東話來。「臭唔臭嘅嘢就見仁見智，我覺得唔單止唔臭，重幾香㖭，我入親去辦公都會休息番十五分鐘先出嚟。」「你咁即係打橫嚟講?!」港方廠長額上青筋開始暴現。「你唔好以為我平時唔多講嘢就好蝦？其實係我個人外冷內熱
……」中方廠長的頸筋也開始一條條數得到，亦開始剖析乜嘢係外冷內熱。如是者，廁所臭唔臭這議題持續了一段時間，每次開會都有相類似的爭拗，其餘的十數人只有望錶及郁身郁勢，時間浪費了，其他議程亦被拖慢了。
本屆立法會明星如雲，IQ、EQ加起來冇一萬都有幾千，如果人人本着以香港為最大利益為先，實乃港人之福，但如果大家為拗而拗，為反對而反對，咁多位高手我諗真係有排拗，正經嘢一啲都唔使傾；香港市民亦只有苦過DeeDee。希望類似上述的廁所臭唔臭事件不會發生在立法會內，幾百萬人工一個月加埋幾百萬市民的信任，麻煩咁多位大俠盡量傾正經嘢。