憑主演全球狂收超過四十六億八千萬港元電影《受難曲》而聲名大噪嘅占士卡維素（JamesCaviezel），原來除咗扮耶穌叻之外，拍動作片亦相當拿手，早排佢喺懸疑電影《極速狂逃》入面，就扮演一個飛車高手，拍攝連場驚險場面。
《極》片係講占士飾演嘅格雷五年前親眼睇住老婆俾車撞死之後，走遍美國追查當時不顧而去嘅兇手下落，最後俾佢發現兇手原來係一個專喺公路上撞女人嘅變態殺人狂。今次狂徒睇中咗露娜美查（RhonaMitra）扮演嘅少女莫莉，格雷於是利用莫莉引狂徒出嚟作一個了斷。
占士本身係一個賽車迷，所以揸車技術有番咁上下，佢為電影試車嘅時候重以時速一百公里飛馳再做出急停煞車同飄移等高難度動作，呢啲令人睇到眼定定嘅場面，《極》片入面重有好多。不過要數最巴閉嘅場面，就係一幕隧道大車禍，電影公司特登搵咗八十個工作人員喺八個星期時間內，用一萬二千噸水泥建造咗一條長七百五十呎嘅大型行車隧道，來拍攝一部大貨車高速撞爆隧道的鏡頭，所以呢場戲只可以一take過，唔可以有任何差錯，難度真係幾高㗎！