阿根廷換咗由比格文執教後第一場波就大勝烏拉圭四比二，承接奧運隊奪金牌氣勢，一批曾經失意嘅球員好似費古羅亞、沙維奧拿等，一吐烏氣，踢場爭氣波。
球迷唔知記唔記得，幫阿根廷入兩球嘅長髮仔費古羅亞，曾經去年夏天以二百五十萬鎊由國內羅沙里奧轉會到英超聯搵食，效力伯明翰，但就長期不受重用，最多係喺聯賽同聯賽盃後備各上陣一次；最終四個月後走頭，之後輾轉去到墨西哥聯賽球會藍十字，今次呢位二十三歲前鋒終威到盡。
其實，俾巴塞隆拿借到摩納哥嘅沙維奧拿，同埋皇馬棄用嘅甘比亞素，表現都好戮力，狀態重好過以前，沙維奧拿呢場比賽冇波入，只係欠球運；重有哥洛仙尼以前一樣係「人球」，借來借去。我求大俠真係唔明，點解呢幾位阿根廷球員咁有潛質，都俾大球會當垃圾，真係走寶！
帶領克羅地亞奪九八世盃季軍嘅巴拉斯域，曾經到過亞洲出任伊朗國家隊教練，𠵱家又有新搞作從政，以獨立人士身份參加克羅地亞總統選舉。我求大俠記得好多昔日球星或者教練，從政最多都係出任同體育有關嘅職位，但好似巴拉斯域咁，競選國家領導者，真係非常罕見。
塞內加爾前鋒迪奧夫喺場內表現唔好、場外紀律又差，今屆淪落到要踢保頓（重唔係正選嗰隻）；點知佢唔知自愛，歸隊備戰周日作客利比里亞嘅世界盃外圍賽時，竟然喺上周五到夜店買醉到上周六清晨，結果俾塞內加爾教練史堤芬逐出隊，真係面係人哋畀、架係自己丟！
喺英格蘭主場對威爾斯時所入嘅第一球，既似係中場林柏特取得，亦似前鋒奧雲係功臣，甚至可能係威爾斯後衞迪蘭尼「擺烏龍」。雖然馬會足智彩好快決定「首球」係林柏特，但兩間英國博彩公司PaddyPower同Bet365就林柏特同奧雲「首球」都派彩，皆大歡喜。
自從基拿甸奴火速上位後，成日俾人話佢係翻版恩沙基，兩個都喺皮亞琴察起家，而且都係帥哥成日入波。不過睇完前晚意大利場波，佢兩個最似係踢法，成日跌落越位陷阱。基拿甸奴呢場波好幾次「快人半步」後，似足恩沙基一樣第一時間埋怨球證，唔知咁算唔算好學唔學呢？