上周五外圍股市麻麻，港股暫時都會麻麻，但估計低位承接力唔弱。有名牌專家睇淡明日賣地成績，可能係好事，一旦成交價好過預期少少，大市扭轉跌勢都未定。
國壽C輪：上周五，保險股中，人保（2328）有1格進帳，平保（2318）冇跌到，跑贏國企，可能同上海A股與深圳A股分別上升1.9%與3%有關。國內保險股例牌揸好多國內A股。但國壽（2628）則冇兩隻同類股咁好彩，跌兩格，收5.05元，國壽C輪更雞毛鴨血，2143收27仙，散17%，最低之時散過23%，跌到過晒火位。博國壽守得住5元及獲得同類股支持，2143博反彈。
另1隻國壽C輪9231，收45仙，散21%，冇晒溢價，槓桿率11.2倍，未來即時變化，係正股正負2%，隻輪升跌22%。下月4日最後買賣，時日無多，炒快到期窩輪心理壓力好大，博正股升番買C輪，揀2143好啲。
華能C輪：中電國際（2380）招股爆燈，兩隻內地電力股有人吼，華能（902）收6.35元，冇升跌，收市前6.40元掃得好勁，實際升1格。C輪9197已當正股上升，收13.3仙，大升19%。隻輪明年1月到期，溢價11.3%，槓桿率9.5倍（有效5.2倍），引伸波幅高達48.5%，因住升得過度，值博率唔高。
大唐C輪：大唐（991）升1格，收6.70元，C輪9046收24.5仙，溢價20.1%，槓桿率27.3倍（實際8倍），引伸波幅高達40.7%，街貨非常少，輪價波幅大，值博率唔高。
章盛