大導演吳宇森最近同霍士電影公司達成協議，將八十年代經典卡通片《He-Man》拍成荷李活真人版。噚日有消息話，吳宇森將會搵人氣電視劇《色慾都市》嘅靚仔積遜路易斯（JasonLewis）做He-Man，而片中嘅奸角骷髏魔，將會落喺吳宇森嘅愛將尼古拉斯基治（NicolasCage）手上。
吳宇森自從去荷李活拍片以嚟，一直同尼古拉斯合作無間，繼九七年嘅《奪面雙雄》同埋前年嘅《烈血追風》後，今次已經係佢兩個第三度合作。雖然尼古拉斯經常做忠角，奸角唔知係咪佢嗰瓣，不過有人笑佢個樣似足骷髏頭，今次搵佢扮骷髏魔，真係不作他人選。
而吳宇森之所以睇中現年三十三歲嘅積遜路易斯，皆因佢自從喺《色慾都市》中飾演蕩女Samantha嘅男友後，受盡懷春少女歡迎，所以希望套片能夠令男女通殺。
不過我馮仁昭最關心嘅都係吳宇森唔知會唔會要He-Man手揸雙槍，又或者加一場白鴿飛天嘅戲啫。
何韻詩日前拍攝新歌《艷光四射》MV，同四位着超短褲嘅男舞蹈員大跳辣身舞。阿詩雖然見慣大場面，但當拍攝嗰陣，阿詩唔單止唔敢正視佢哋，而且重一臉尷尬，幾經導演費盡唇舌之下，阿詩先至可以投入演出，不過拍攝時，阿詩又有意無意間雙手護胸，唔通係學蕭芳芳話齋，女仔要學識保護自己？
有古典辣妹之稱嘅英國四人女子弦樂組合Bond噚晚喺灣仔會展舉行第二次香港演奏會，新人關之彤同趙式芝都有捧場。Bond四位成員Haylie、Eros、Tania同Gay-Yee以性感服飾現身，令台下大班中年男fans拍爛手掌。Haylie重講普通話：「香港，您好嗎？」
噚日吉隆坡有報紙大字標題，話當地一位三十三歲空姐劉鳳君，早幾日做完隆鼻手術後，前日返整容院覆診時突然暴斃。
劉鳳君曾經拍過廣告，佢嘅親友後嚟同當地傳媒講，話劉鳳君係成龍嘅好朋友，一時間搞到謠言滿天飛。不過，劉鳳君家人噚日向傳媒澄清，話一切純粹誤會喎。
台灣女星王靜瑩噚日嫁畀身家有成半億嘅台灣富豪陳威陶，有傳新娘子係奉子成婚，但係新娘新郎唔肯認，反而女方嘅媽媽就證實個女有咗三個月，其實𠵱家咁嘅年代，有咗先結婚根本好平常，雙喜臨門咪重開心。新娘子話佢同老公已經協議咗小事由女方話事，大事就由男人話事。
