泛民主派喺今屆立法會有二十五席，雖然未夠過半數，但係都係一股極之重大嘅反董勢力，上周更成功突圍，取得財委會主席一位，全港為之震驚。當日梁耀忠話自己因為要見一個好重要嘅人提早離開，八方問佢係咪諗住輸梗，所以選完主席同內會主席就鬆人？點知阿忠話佢從來唔理贏輸，只係諗住快快走出去見人，然後返回議事堂投票，可惜就遲咗一啲。
今次好彩因為有人臨場過票支持卿姐，如果只爭一票，阿忠實俾民主派人士埋怨死。原來嗰日鄭大班（圖）唔只提名卿姐，重同佢四圍拉票，數住啲人唔畀走，只係走甩咗阿忠，唔怪得有人叫大班做泛民主派嘅派鞭。
當然泛民主派派鞭不易做，因為人人都係大佬，好有性格，未必聽你點，大班已經算有江湖地位，否則重難擺平。其實睇吓華叔就知啦，佢夠係民主黨黨鞭，佢有一日同八方講，白鴿黨從冇講過黨鞭嘅職責係乜嘢，佢哋聽就講吓，唔聽亦無謂嘥氣。
傳真︰2623-9278
電郵︰