中華民國雙十節，陳總統水扁發表宣言，指出「對岸」部署針對台灣中華民國嘅導彈，經已超過六百口！
陳總統又話：「對岸」用恐怖威脅，黑暗陰影嚟對付台灣中華民國，係唔會達致雙贏，最緊要係恢復九二年辜汪香港會談嘅共識，即是「一個中國，各自表述」。
陳總統向美國買六千億台幣軍備，而阿胡就派出農民外長李肇星出國到處游說，猛叫歐洲解除對北京嘅武器禁運。即是好快有一日，台灣中華民國同對岸發生戰爭，一邊用美國槍炮，另一邊就用歐洲導彈互轟，鬼佬啲軍火，究竟係歐洲嘅精良，定係美國貨正啲，大家唔使擔心，毋須等好耐，到雙方開戰，兩邊共隊冧番一億零人，到時點算屍體，睇吓邊一邊死多啲，就有答案。
今次法國總統希拉克趁住雙十，走去北京訪問，擦完阿胡一輪鞋，就打蛇隨棍上，幫口猛話歐洲應該恢復向北京出售軍火。
點知外國記者唔生性，即時問阿胡六四問題，阿胡一口拒絕「平反六四」，對於嗰啲日夜求神拜佛、祈禱阿胡轉性開放中國民主自由嘅幼稚文人，無疑係一盆冷水加一個晴天霹靂，都幾人心大快！
阿胡高調否認中共轉性，而陳總統嗰方面又唔生性，經常挑逗胡溫，好似想博胡溫郁手，然後一聲先撩者賤，萬炮齊轟上海，導彈直擊三峽水壩。既然雙方都咁癲，兩岸又點會遵守「行為規則」？因此聯合國安理會常務理事國擴大名額，加入日本、德國、印度三大強國，實係十分必要，到時加埋美國，由各國共同簽署一項「永久禁止台海兩岸軍火交易委員會」，為咗捍衞世界和平，杜絕台海戰爭，兩邊各摑兩巴，齊齊向台海兩岸永久禁售軍火，省得扁胡雙方，日夜罵戰，一陣又九二共識，一時又一邊一國，講埋啲五十年不變嘅廢話，嘈住香港人唱Ｋ賭馬、揼骨打麻雀。
只有全球聯手，㩒實台海兩岸嘅軍國主義好戰分子，一概禁售軍火，先至可以維持不統不獨嘅和平現狀，咁中華民國人士就可以繼續經香港濕濕腳出入大陸，香港身為中間人就永遠有水抽。呢一樣，就係香港人嘅雙十節嘅心聲，陳總統冇喺總統文告之中如實反映，令港人有少少失望喎又。
傳真︰2623-9278
電郵︰