成班前輩銀行家一齊食飯，其中有退休嘅、轉行嘅、做緊董事長嘅，話題離不開轟動一時嘅DBS星展銀行保險箱變廢鐵嘅新聞。
賓架H聽見左丁山講星展保險箱（safetydepositbox），立即話：「喂，報紙、電台，甚至任志剛都講保險箱，全部錯，我哋叫咗四十幾年保管箱，邊度有保險箱㗎，保管之嘛，冇保險㗎，要保險就要另外買！」估唔到一開口就俾前輩窒，好，一於叫保管箱，唔係保險箱。
賓架C話：「銀行搬分行，搬保險箱，有一套嚴謹程序，點會出差錯㗎，唔通啲新仔冇受過訓練？」賓架W話正確做法係早三四個月通知客戶，取銷保管箱，請佢哋清理，交回鎖匙。凡保管箱都有兩條鎖匙，少咗一條就不能打開；銀行揸住某號碼保管箱兩條鎖匙嘅話，即係表示該保管箱已經冇人用。好嘞，收齊鎖匙，請公證行派人嚟監視銀行職員將啲保管箱用兩條鎖匙打開，檢視清楚，知道冇剩餘物件，先至嘜住（譬如在外打紅色大交叉），偶爾發現有剩餘物件嘅，就按客戶記錄通知客戶取回。冇打開過嘅保管箱一定不准工人搬去壓鐵場。
呢啲程序有冇做足，唔知。賓架F話：「你哋可能outout哋，現在興外判，凡係物業管理、裝修，統統外判畀專業公司打理、監督，未必有銀行自己人跟到尾，唔知會唔會係外判公司睇得唔緊呢？」咦，《東方日報》（十月七日）話仲量聯行可能因呢單DBS事件而不加薪，不發花紅，該煨咯。
賓架K問：「DBS三個字代表乜嘢呀？」左丁山以為係IQ題，立即答：「DepositBoxSafety。」旁邊嘅賓架S搶住講：「應該係Don'tBeSingaporean!」