中方喺九月底搞咗個國慶觀禮團，好多赤色大富豪居然唔畀面胡錦濤，膽大包天抗命缺席，八方日前喺個酒會碰到貴為政協常委嘅陳永棋，問佢點解唔見人，唔通驚老江有機會反撲，費事買得咁實淨？
陳永棋話佢剛好嫁第二個女，個女婿係德國印尼混血兒，所以要喺德國請喜酒。咁棋哥同李嘉誠平起平坐，大把機會見中方領袖，隨時單拖可以夜會胡溫，使乜排隊咁冇飛士？
講起個女婿，棋哥眉飛色舞，話佢同個女係大學同學，精通多個語文，好叻仔，𠵱家佢同個女都喺香港工作。陳永棋平時都頗寸，但一講起兩個寶貝女，就成個唔同晒。佢話，兩個女都嫁晒人，孫都抱埋，屋企只剩番佢同老婆大人以及一隻十幾歲嘅老貓，夠晒清靜，八方笑佢，咪多啲時間睇亞視囉，反正陳永棋成日都話亞視快上市啦。
八方早前講過李明逵係唯一一個紀律部隊冇代表上京觀禮，但原因不明，嗰日終於有警隊中人講多一句，話一哥有重要任務要留喺香港，乜嘢任務又係冇得講。
（圖）陳永棋要喺德國請飲，唔怪得冇上京。
傳真︰2623-9278
電郵︰