在無綫電視劇《金枝慾孽》中飾演如妃而人氣急升的鄧萃雯，原來與金馬餐廳淵源甚深，父母都曾在金馬餐廳打工，並因而邂逅結良緣。雯女亦表示，自小已光顧該店，最喜歡食品是招牌焗豬扒飯，她昨日得悉金馬餐廳結業，深感可惜。
「金馬餐廳係我爸爸媽媽相識嘅地方，佢哋都喺嗰度做過嘢。」鄧萃雯昨日向本報記者說：「好細個，我嫲嫲已經帶我去嗰度食西餐啦，印象中嗰度環境暗暗哋，感覺好浪漫。」雯女又表示，自小受金馬餐廳影響，所以平時較喜歡去燈光偏暗的西餐廳，她說：「光燦燦嘅西餐廳唔夠浪漫！」
雯女又表示，不久前仍陪伴父親到金馬餐廳探訪相識幾十年的老朋友。據金馬老夥計表示，鄧萃雯的父親鄧鏗榮當年在餐廳任職樓面，「佢英文好掂，又識日文，所以好多外國客都由佢落order。」至於雯女的媽媽，該名老夥計表示，「佢喺舖頭賣西餅麵包嘅，生得好靚，白雪雪，雯女好似佢阿媽㗎！」
六十三歲的鄧鏗榮昨日亦對本報記者表示，早於六三年在位於弼街的金馬餐廳工作，該店最早的西餐師傅亦由鄧鏗榮祖父由澳門中央酒店帶過來。他說：「我阿爺喺澳門中央酒店做主管，金馬開業嗰陣，香港重好少似樣嘅西餐廳，金馬可以話係呢類西餐廳鼻祖！」
本報記者