恒基新盤中半山麥當勞道11號，只有二十八個單位，賣咗六間，剩低二十二間，發展商用咗半年，揼咗千五萬，將其中六個裝修成示範單位，由三個設計師操刀，各有特色。
包括金色及銀色系列單位，其中金色嗰間，相對較搶眼，連地氈、窗簾、牆身與天花一律金光閃閃，成間屋鋪天蓋地都係金色，雖然唔係人人接受，但係非常創新。
恒基有鋪做示範單位癮，最經典莫過於大埔比華利山別墅一百間示範洋房，聽講，發展商為呢個創舉，申請入健力士大全。
代理透露，恒基包裝得靚嘅單位，又真係特別好賣，好似皇牌豪宅中半山富滙豪庭，示範單位做一間賣一間，大客仔都特別鍾意買示範單位，因為以同樣裝修費，做唔到發展商咁豪華嘅裝修。
相信今次麥當勞道11號，都係用呢個策略賣樓。
近排樓市好，代理生意有進帳，自不然要論功行賞。
利記噚日宣布，有十位前線員工升職，包括徐志華升為將軍澳區域董事，施志剛及姚偉基，分別執掌鯉景灣及港景峯，雙雙晉升為區域經理。另外，新增設嘅助理區域經理一職，就有六位前線員工升任。
執行董事廖偉強話，今次一嚟為咗強化中層管理層，其次係配合分行網絡擴充。
城大管理科學系副教授、兼出名財經專家曾淵滄教授，日前擔任中記樓市講座嘉賓時，話樓市其實好似股市，當股市炒家狂炒仙股，樓市炒家將二三線屋苑當豪宅咁炒到㷫烚烚，呢啲屋苑全部升格為「假豪宅」嗰陣，就係樓市快冧嘅先兆。
佢話，青山公路浪翠園就係「假豪宅」表表者。此言一出，搞到同場另一嘉賓九倉黃光耀即刻笑得鬼死咁尷尬，因為佢𠵱家賣緊嘅深井碧堤半島，正係用豪宅嚟包裝㗎嘛。
好彩曾博士反應快，即刻兜番，話唔係要打擊黃生個盤，因為𠵱家距離九七最癲嗰陣重好遠，叫大家放心去買碧堤。當然如果發覺碧堤都炒到癲晒嗰陣，就要識走嘞。
代理開舖、慶功等場合，都鍾意開香檳同放皺紙炮，有開單爆數嘅意思。雖然一時間場面好熱鬧，氣氛好激昂，不過，歡樂過後，就留低好多手尾，辛苦一班清潔員工。
深井碧堤半島二期噚日頒發銷售大獎，得獎嘅美記同港置，都樂此不疲噴射幾十支皺紙炮，連嘉賓都俾皺紙包圍，重要噴到成地香檳。
現場嘅清潔員工，喺未開始前，已經攞定掃把準備，等佢哋搞掂晒，即刻好敏捷咁出動，跟住重要用漂白水抹，蘭西都要話句：「辛苦晒！」
蘭西
電郵地址：
