余文樂最近為配合新歌《生還者》宣傳，前日同十五位歌迷去咗西貢鹽田仔度玩一個名為「生還者遊戲」，現場有八位導師監督，雖然只係遊戲，但過程會幾辛苦同危險，阿樂同班歌迷要喺荒島度自己煮嘢食，搭帳營，重要攀山涉水通宵行山，半夜先至有得休息。而第二日清晨就要親自去指定地點攞早餐，唔係就冇得食，去廁所重要自己挖窿㖭。
成班人前日集合時，大家就好似喺學堂咁排隊等候導師點名，阿樂可能重未入狀態，俾導師好大聲咁鬧佢唔識帶頭行，搞到班歌迷都唔知點跟，咁啱當時成班記者喺度，有位日本女歌迷重專登入去睇佢，喺啲歌迷同記者面前失威，阿樂尷尬到死。
阿樂後來都話：「我冇諗過咁嚴，不過冇所謂啦，咪當自己係參賽者囉，唔好當自己係明星，咁證明係公平嘅，出得嚟行，預咗要還。」
阿樂重話有一段要自己單拖行山嘅路，係全個遊戲入面最危險嘅一環，佢最怕遇到偷渡客同賊，所以佢連鑽石耳環都除埋，怕俾人搶嘢咁話。
台灣名模林志玲呢幾日出席巴黎時裝節，順便參觀咗一間珠寶行製作珠寶嘅過程，工作人員帶咗佢去工作坊，重同佢解釋珠寶由設計到完成嘅流程，原來係要先畫出設計圖，之後用蠟做成樣本，樣本經過修飾後再鑲鑽石，最後再將鑽石拋光。林志玲話估唔到過程咁複雜，令到佢好佩服呢班幕後功臣。
內地女星章子怡早前接受英國《時報》訪問，佢喺訪問入面表現開朗，而且不時講一啲英文笑話，可見佢近期嘅英語水平有明顯嘅進步。另外章子怡又提到佢主演嘅荷李活大製作《藝伎回憶錄》，佢話能夠接拍呢部電影感到好興奮，因為呢部片係佢首次擔正嘅荷李活電影。
徐濠縈喺上個禮拜剖腹生咗個女Constance後，要住院成個禮拜，不過由於佢住政府醫院，就算開刀嘅都最多住得六日，所以阿徐噚日一早趁記者未到，就由陳奕迅陪伴出院，滾水淥腳咁走人，怕俾人影到佢生完個樣，相信佢坐完月，兼收身成功後，就會大方出嚟見人喇。
趙薇早排喺北京涉及孕婦鄒雪被打案，噚日有內地報道話鄒雪喺上個月底已經誕下一對雙胞胎，鄒雪嘅律師鄭軍重話涉嫌行兇者、趙薇嘅司機吳珏，派出所到𠵱家都未搵到佢嘅下落，不過鄒雪喺坐完月後，就一定會採取法律行動。
