冠軍（092）喺上周四牛皮市搶到上10球，周五雖然跌市，但成交股數達4球半，聞到有味。冠軍今年5月創出1元52周低位，同歷史低位比較，唔差得好遠，經過最近4個月反彈，現價只較52周低位高出28%，較52周高位有近5成升幅。睇往績，冠軍PE4倍，04年中期（12月止）純利1.47億元，同03年度（6月止）1.9億元差無幾，即係話，04年下半年，係咁以賺5000萬元，全年純利又係咁以維持03年度水位，PE繼續走低。冠軍每股資產值約4元邊位，現價折讓大約68%，科技股邊得咁殘？
睇番最近呢1個月，冠軍每日平均成交股數去到490萬股，相對最近3個月平均成交250萬股，幾乎起個孖，股價未發力，成交先見異動。短線突破到1.35元橫行阻力位，冠軍會有一輪衝刺，股價離52周低位唔係咁遠，風險有限，可以睇睇。
新世界中國（917）8月15日見報品評過，翌日（周一）股價2.05元，最新造2.5元。當日為文，曾經指出，新中相對阿媽新世界（017）有個優勢，就係新中獨立於新世界信息（301），所以，新信息業績有任何風吹草動，唔關新中事。
上個星期，新信息話可能作巨額撥備，連同阿媽新世界雙雙發盈警，股價彈散。嚟緊星期五，係新世界系公布業績日子，新中隨時跑出，到時萬千寵愛，上個星期嘅股價受同系負面消息影響，有調整，又係兜底之時。
錢雋