最初開始寫呢個專欄嘅時候同編輯講過我最唔想寫影評，因為作為一個業內人其實好難去客觀咁評論一部戲。但係終於都忍唔住，因為真係好想寫《2046》。唔係影評，只可以話係一啲觀後感。
我好喜歡睇王家衞嘅電影，我喜歡佢對時間嘅觀察，對角色嘅描寫。由《阿飛正傳》開始（《旺角卡門》上映嘅時候太無知，唔識去戲院睇電影），我都係第一時間去戲院入場觀看王家衞嘅電影，因為實在係需要一個咁大嘅銀幕至可以睇到電影內綿密細緻嘅內容。跟住出咗DVD就一定要買番隻即刻睇啦，有線電視一播就唔知點解好似擰唔開個頭咁又要睇。印象中睇得最多嘅應該係《重慶森林》同《東邪西毒》，總之，佢嘅戲就係有種魅力搞到你係咁睇。
今次《2046》我更加係去睇首映，以質素嘅角度嚟講，我覺得係AA+，無論視覺風格、畫面構圖、美術、服裝、配樂、音效、演員等等……全部都係冇得頂，我覺得絕對係一部好電影。但係我就唔想再睇，因為睇得好辛苦，辛苦嘅地方係戲裏面嗰種無所不在嘅沉重，周慕雲面對過去感情嘅包袱，好似壓埋落我度咁，我都想幫佢手叫救命。點解咁悲觀呢？點解一個叫《2046》嘅戲係話畀大家聽呢個世界係冇未來？我唔知！不過我相信無論過去發生啲乜嘢事，我哋都應該面向未來。呢個可能係累積五年嘅力度至可以做成。
聽到好多人話套戲悶，我就覺得如果稍為有感情嘅人一定唔會咁講。相信好多年之後大家會對《阿飛正傳》+《花樣年華》+《2046》三部曲有一個公正嘅評價，希望王導演可以繼續努力，因為咁堅持嘅人𠵱家真係好少見。同埋快啲拍套搞到我係咁不停想翻睇嘅戲。