黎明、劉德華、張學友和郭富城在九○年代堪稱樂壇「四大天王」，光輝期長達十年，但時移世易，四大天王的年代已成過去。主力在影壇發展的華仔已成為票房保證，黎明自言拍馬也追不上他。在父母離異的陰影籠罩下，黎明已對婚姻失去信心，並表示可能孤獨一世。
黎明、劉德華、張學友及郭富城九○年代被封為「四大天王」，稱霸樂壇超過十年。時至今日，不少報道都指「四大天王」已經成為過去式。
天王之一的黎明日前在九龍塘接受本報訪問時，對此輕描淡寫地說：「四大天王喺我心目中根本冇存在過，見到嘅只係良性競爭，由以前到𠵱家都係由媒介去主宰，由媒介嘅興趣而產生比拼，但比得多都麻木。」
黎明續說：「今日嘅華仔喺電影上放咗好多時間，喺形式同票房上都有穩定性；學友做佢自己想做嘅音樂，做佢想做嘅《雪狼湖》；郭富城亦都做緊自己嘅嘢。
「理鬼出面四唔四大天王吖，做得唔好就會被淘汰，愈係天王愈係踩，天王都冇面畀！我從來都冇當過自己係天王，傳媒話今日已經冇天王，但唔好忘記，轉頭又寫有韓國四大天王，所以我哋都係局外人。」
年前黎明被指事業跌落谷底，甚至有報道以天王末路來形容他，當時他聲稱有人要鏟除他，對於那段不停被負面新聞纏擾的日子，黎明失笑道：「嗰時我開演唱會，未賣飛就話死梗、仆直！開騷嗰日，六點五十分入場影滿場空櫈，冇人入座，唔通我又要去解釋咩？我唔會承認黎明喺工作上係弱者，但好奇怪，愈強壯就愈係攞嚟踩！」
黎明可覺得圈中有害群之馬？他說：「唔係嘅，每個人嘅生活方式唔同啫，好似係一個武林，有捕頭緝拿壞人歸案，亦有啲捕頭同壞人同流合污。唔係錯嘅，你選擇邊樣，冇人阻止，不過我覺得大部份嘅人都係好嘅。」
黎明兩年未曾出過唱片，近日才推出新碟《Dawn》，有人評他的歌曲沒有多大變化，他對此說：「對歌手嚟講，咁講好膚淺，當初學友係咁唱，鍾意黎明時亦係咁唱，唔通變到聽唔到係邊個至好咩？呢啲係通俗嘅批評。」
黎明兩年出一張唱片，一年拍一至兩部電影，是否貴精不貴多？他笑說：「講好聽啲就貴精不貴多，大家要求、我又做到咪做，我都試過每年拍三、四部電影，視乎每個人性格，做嘢嘅方式有好多。」
如今唱片市道低迷，黎明何不效法華仔主力拍戲？他說：「唔可以咁計，華仔嘅班底、累積嘅嘢比我多，有啲嘢我冇可能同華仔比，有啲嘢佢多你七年就係七年，佢喺電影上做多我七、八年，有啲嘢追唔番，唔可能㗎！」
