黎明與舒淇的戀情撲朔迷離，問黎明現在是否與舒淇拍拖？他卻說：「曾經同現在都冇！我知咁講，啲人會話黎明黐線、白癡、講大話！係冇，由始至終大家係朋友，講呢樣真係好悶蛋、超煩。」
黎明的戀情一直備受外間關注，未知他現在的感情生活如何？他笑說：「大家想我好，想我將來美滿，就永遠唔好再提，眼睇住B哥（鍾鎮濤）同章小蕙當年拖住手去《太陽計劃》，但今日呢？我做娛樂圈，拍拖唔係畀大家分享。」
黎明是典型的人馬座，他常形容自己喜歡自由，不愛拘束，他說：「有個fans寫信嚟，佢話黎明你講嘢唔好咁口響，有日你呢隻馬會俾人扯住條頸要結婚㗎，我承認嘅，但幾時會被人勒住條頸，我唔知。」
現年三十七歲的黎明對愛情有甚麼看法？他說：「我父母結完婚又離婚，你話結婚有乜安全感？但我曾經幻想結婚係乜嘢感覺，發吓白日夢都有嘅。」
多年來，可有女友令黎明產生過想結婚的感覺？他說：「絕對冇，黎明呢種人，命運可能係孤獨一世。」但他自言是個好情人，他說：「當我愛一個人，會正到飛起，我容易𠱁、容易信、容易畀，有晒男人基本條件，重唔正到飛起呀？」
採訪：朱倬誼 攝影：仇志德