《木馬屠城》一個大家耳熟能詳的史詩式戰事，但問到全件事的始末，又有幾個人能說得出？《木》曾經被搬上銀幕無數次，論浩瀚程度，則以2004年版最有睇頭。千軍萬馬再加猶如戰神化身的畢彼特，浴血戰場下重建3200年前的特洛伊古城，絕對係今個星期炸爆機嘅DVD精選！
記者：朱崇德
講到《木馬屠城》，好多人只知道木馬藏人暗渡陳倉，就再說不出其所以言來。其實《木馬屠城》是根據公元前8世紀希臘詩人荷瑪的曠世史詩《艾利略特》（Iliad）改編，裏面最經典當然是記載了公元前11世紀，古希臘和特洛伊之間所發生的一場史詩式戰役。
公元前1200年，古希臘不斷併吞小國差不多完全稱霸愛琴海！但在太陽神阿波羅庇佑下，特洛伊一直是個攻不下的傳說。可惜紅顏禍水，特洛伊小王子在出使希臘求和時，愛上希臘王阿伽門農之弟─斯巴達王的王后，還雙雙出走，引發到國與國之間的戰爭！在戰事膠着中，只有傳說中世上最偉大的戰士阿基尼斯（畢彼特飾）能扭轉勝負；傲慢不羈的阿基尼斯答應攻打特洛伊城，全因要滿足戰無不勝的虛榮心。
千軍萬馬列陣，可謂《木》的最強賣點！基本上全片動用了1,250多名臨時演員，再加三星期的密集式訓練，教授他們行軍的步伐、手執武器的姿勢及接受命令的準備。所以睇落特別有真實感。此外，《木》還使用了最新「虛擬特技人」的電腦特技，電腦特技員引用牛津大學動物學的軟件「腦內啡」，這是由人類的神經生物學研究發展而成；特別之處是虛擬人的「腦內啡」，能令每個角色有自己的反應、動作和知覺，所以每個角色就可以做出無盡無窮的打鬥招式。
電影中共有5場戰事，導演胡根彼得遜為咗表現其真實感，講明呢套係賣血賣肉！雖然只係「IIB」級，斬頭、割喉、長劍貫胸而過，絕對係II級尾，最搶眼當然係畢彼特所飾的第一勇士阿基尼斯，以50人的小蹤隊搶灘特洛伊，有萬夫莫敵之氣概，舞劍使盾之閒熟，猶如「人中呂布」。
好多人都歎《木》一味打大場面大戰爭，筆者反覺得導演拿揑得十分好，有搶灘、圍城、以弱制強、突襲、主帥單挑、火攻、奇襲，簡直猶如睇緊《三國演義》，再加強勁聲效，真係睇得人非常熱血沸騰！唯一不足處，未有如《雷霆救兵》般，能令人有毛髮直豎的感染力和戰爭罪惡感，可謂一大可惜！
DVD是雙碟設計，Making都差不多有成粒鐘，都算幾抵睇；首推是《大戰方酣之幕後花絮》，由特洛伊的傳說講起，到有人發現古城遺迹。猶如上歷史課，不過更鍾意解構黃銅古劍，戲中做了8把真劍，原來就算唔使開鋒、唔使斬頭，只要斬中身體任何部份，都可導致嚴重骨折，古代武器，原來都咁犀利！
