禮賓府噚日好熱鬧，特區政府舉行今年度授勳典禮，由特首董建華向三百五十五人頒授勳章同獎狀，當中包括咗一眾嘅社會賢達，好似喺舊年沙士期間盡心盡力嘅中大內科及藥物治療學系教授沈祖堯，同港大微生物學系系主任袁國勇都攞到銀紫荊星章，重有獲得榮譽勳章嘅淘大花園業主委員會聯會主席葉興國。
攞到勳章當然好啦，但係葉興國就話心情好複雜，重好感慨咁講：「今次得到授勳，係要唔死得先至有。」佢話舊年本港經歷沙士，過程真係好慘烈，尤其係淘大花園E座，好多高官都唔想去。雖然佢攞到勳章，但噚日都好坦白咁批評董特首當日落疫區巡視係落遲咗，重話如果落早啲大家都會打咗支強心針。
不過，件事都過咗去，葉興國噚日就同董特首講，𠵱家淘大花園換緊外牆污水渠，出年三、四月就會完工，叫董生到時去睇吓，佢話董生已經答應咗。
今次授勳典禮之中，大紫荊勳章因冇人得獎，所以要數攞最高榮譽嘅可以話係金紫荊星章。曾經力撐23條立法嘅民建聯副主席葉國謙，做唔成今屆立法會議員，但就攞番個金紫荊星章補數。不過佢話攞到獎係證明佢服社會得到認同，唔係政府畀佢嘅「安慰獎」。
傳真︰2623-9278
電郵︰