吳啟華前女友金巧巧最近突然喺網上徵婚，成為第一名喺網上徵婚嘅內地演員，佢日前就同記者講，話佢嘅生活圈子太細，喺圈入面又難搵到真愛，所以先諗住喺網上徵婚。個徵婚啟事已經放咗上網個幾月，但係應徵者就寥寥可數。
金巧巧自爆話上網徵婚係因為同吳啟華感情破裂，佢話：「我和吳啟華分手後就沒有了愛情，他是我從相識、相愛到分手的第一個男朋友，我和他曾有過一段刻骨的愛情。」
已經三十幾歲嘅金巧巧，原來佢呢個行動亦得到父母嘅支持，佢話：「爸爸幫我起草了徵婚條件放在網上，還幫我改了個名叫金斯基，同時亦貼了我的相片。」個徵婚啟事到𠵱家已經擺咗個幾月，但係應徵者就寥寥可數，金巧巧就死撐話大多數人唔相信佢係真嗰個金巧巧喎。
吳浩康噚日接受新城電台訪問，佢話傳咗口訊畀陳奕迅恭喜佢做老竇，重話真正嘅Eason接班人已經出現，唔輪到佢嘞。吳浩康又話自己都好鍾意小朋友，不過又話將來如果生咗細路，會將養佢嘅錢列張清單畀佢叫佢還。咁吳浩康係咪應該還咗自己欠佢老竇嗰筆先呢？
王力宏幫緋聞女友張惠妹作嘅歌《火》，唱片公司竟然要王力宏錄一段呻吟聲作為賣點宣傳，佢知道之後唔多高興。張惠妹噚日喺台灣錄影電視台節目時，話知道呢件事後心情都唔好，亦覺得咁樣對王力宏好唔公平。而佢已經打咗電話同王力宏道歉，之後佢同主持人講起自己過咗身嘅爸爸，重突然喊咗出嚟。
呂少玲前晚喺中環大會堂同一班中大校外進修課程嘅畢業生一齊開咗個畫展，重有成十幾幅作品展出，大哥洪金寶亦有到場支持。洪金寶話佢自己好鍾意畫，不過就對畫畫唔在行，雖然曾經諗過去學書法，但係因為心太野所以未成事。
張智霖前晚拍攝無綫節目巡禮《絕世無雙》嘅片段，佢話𠵱家同無綫簽約一年拍一劇，而嗰套係古裝劇。佢就話唔係太鍾意拍古裝，因為嫌黐頭套辛苦喎。佢又話因為同無綫關係好，所以先肯幫手拍宣傳片。而佢拍嘅《水滸無間道》到𠵱家都重未上映，佢就唔擔心會變成倉底貨。
