早前喺幕張舉行嘅東京遊戲展中，XBOX同Tecmo展館拍住擺，力谷以靚女打交作號召嘅《DOAUltimate》，成為遊戲展其中一個焦點。今個星期XBOX就專程喺香港搞咗個「XBOX年度檢閱2004」，除公布Live!最新動向之餘，當然唔少得多個即將推出遊戲，其中最多人玩嘅《DOAUltimate》，依然美女雲集，加上全新製作嘅舞台，靚人靚景啱晒機迷口味！
記者：許福合
若然你係《DOA》嘅Fans，今集《DOAUltimate》可能覺得冇咩新意，其內容主要係從第一、二代移植過來。不過一玩，人人第一句都一定係「好靚！」遊戲內無論畫面到打鬥場景、人物服裝等，都經過重新製作，視覺效果絕對非以往可比！角色例牌加入更多唔同裝扮，好似女忍者霞嘅聖誕裝同學生裝等，雖然無喺《沙灘排球》登場時穿泳衣咁搶鏡，但又有另一番唔同味道，而且每個角色除咗原有服裝外，當達成指定條件後，就可以獲得新裝，令玩家可以不斷保持新鮮感！戰鬥場景亦來個大翻新，在以往金碧輝煌嘅歌劇院，將會被烈火所包圍，而且加入唔少動感特效，玩落更有現場感。
XBOX年度檢閱2004
今屆嘅XBOX年度檢閱將以「Live!ChangesLife」為主題，擺到明要Live!去招收玩家。Live!發展至今，全球已超過100萬名註冊用戶，上Live!就可以同24個國家機迷作賽。於大檢閱上，一共展出多款即將推出的遊戲及公布一系列XBOX最新動向，除咗今日介紹嘅《DOAUltimate》外，重見到《HALO2》、《FIFAFootball2005》、《Blinx2》及《ForzaMotorsport》等，大會更特別請來港腳文彼得試玩足球Game，不過看來Peter腳下功夫比打機功夫好得多！
作為一個格鬥遊戲，記熟招式仍然係玩家嘅指定動作，不過一般出招難度唔算好高，應好快熟手。最革新嘅玩法必定要提到配合XBOXLive!，玩家可以隨時與其他Live!友一決高下。除咗基本單挑玩法外，更可以一試以1對7嘅SurvivalMode，又或8人大亂鬥模式，統統都係單機版未能提供嘅玩法！唔上網嘅話，仍然可以玩番街機同故事模式，回味傳統格鬥戰。唔想打打殺殺，冷靜下來又可以到相集欣賞《DOAUltimate》內靚人靚相，算係《DOA》嘅另類玩法。
遊戲類型：3D格鬥
對應機種：XBOX
遊玩人數：1至2人（對應Live!）
音效：杜比5.1數碼音效
推出日期：10月28日
行貨售價：$299
XBOXHK
客戶服務專線：800964215
