珠江三角洲一帶樓盤，以平價取勝，但遠啲好似上海同北京，就多數以豪宅作招徠。上海金傑房地產開發公司「東方港灣‧金傑」，以上海澱山湖做賣點，𠵱家攞十五至二十幢嚟香港賣，入場費要過千萬，最貴一幢近三千萬，夠晒豪啩。
呢個盤二百六十幾萬呎，只起八十九幢別墅，每幢佔地萬八至二萬九呎，住宅五千四至近萬一呎，入場費逾千萬。第一期六十三幢，已經有預售批文，今個月喺香港推出，希望三個月可以賣清。
公司董事總經理李曾年話，只係以香港為銷售點，重係優先畀香港客揀，佢笑稱，香港客唔鍾意「賣剩蔗」，所以全部畀港客揀先。佢重話，豪宅盤唔受宏觀調控影響，睇呢個盤，銀行肯承做最少五百萬樓按就知啦。
利嘉閣統計五十個指標屋苑，今個周末有逾二千組客預約睇樓，比前周增加八點二巴仙，重係連升三個月，投資客比例最高，佔兩成二。
以客戶數目計，最多係沙田第一城，有一百五十組，但若以增幅計，最勁係西灣河鯉景灣、大角嘴維港灣、大埔新達廣場、深井碧堤半島同荃灣海濱花園，都係增兩成半。
利記區域董事吳炳深話，因為二手樓價升勢迅速，相信買家會追捧落後大市嘅東九龍住宅。
估計嗰區樓價，今個月可以升八至十巴仙。
就大鴻輝拆售葵涌廣場「時尚坊TrendyPlace」，本報報道出街後，噚日收到讀者報料，話據大廈公契，嗰度只准做酒樓喎。
蘭西問番代理美聯黃子華，佢回應話，嗰度由孖士打做買賣合約，滙豐做按揭。佢反問，若果有唔妥，兩大行又點肯接呢單嘢嚟做？現時商場同層其他舖位，都係由酒樓拆細而成，有六七十間。總之一句，有問題，可以問業主代表律師孖士打。
蘭西噚日收到讀者電話，投訴牛池灣新盤清水灣道8號嘅發展商俊和，冇提供足夠物業資料畀買家，現場又冇樓書。
蘭西打畀俊和董事朱明華問清楚，佢話，物業暫未公開發售，估唔到反應咁熱烈。個別單位以內購形式賣出，樓書會喺一兩個禮拜內、公開發售期間派發，想了解多啲先買，可以等等。佢重話，現場有職員講解樓盤資料，買家有渠道問個明白。
蘭西
電郵地址：