收到幾封手寫來信，三封係講選舉嘅，知道就得，恕不引述。一封係一位梁先生寫嘅，要求本專欄轉述，以免其他家長學生犯上同樣錯誤，枉花金錢，兼夾激氣，打擊青年心理。
梁先生喺九八年送仔往澳洲讀中學，○二年初考入昆士蘭（Queensland）大學讀電機工程，今年讀完三年班。按照大學規定，工科生升上四年班之前，必定要做暑期工（澳洲就快進入夏天），到認可之公司或機構實習八個禮拜，暑期工計入必修學分。兩個禮拜前，學校派發公司之實習申請表，梁仔立即入表申請，但唔夠兩日，公司已經通知佢：對唔住，你落選嘞。原因好簡單，你並非澳洲公民或永久居民。梁仔急忙返學校查問，學校話畀佢聽：六年前（即係一九九八），澳洲政府已經改例，暑期實習工只給予澳洲本土生，海外生冇得傾。現在梁仔進退兩難，冇實習就不能畢業，即使讀埋四年班，成績唔曳，一樣攞唔到學位。
梁先生好憤怒，話：「如果大學○二年招生說明書（brochure）內有提及新例，一定唔畀個仔讀工科。」但事到如今，點好呢？十分無奈，讀書六年，用咗幾十萬，浪費時間，了無結果，梁生希望（一）香港學生唔好中計，如果唔係澳洲公民?永久居民，去澳洲讀工科要睇清楚畢業條件，勿重蹈覆轍；（二）過去梁仔讀咗五個學期，攞咗四次Dean'sCommendation（即係成績優良），可唔可以憑成績申請入讀本港大學呢？
左丁山好同情梁生，憑澳洲成績申請本港大學插班，唔知有冇先例，因為本港大學收生受UGC規條控制，甚不靈活，請你周圍寫信去問吓，大學一定答你嘅，如果唔得，申請去美國州立大學插班，機會好高！