許志安前晚在灣仔會展舉行演唱會，請來陳慧琳、葉德嫻及譚詠麟等擔任嘉賓，其間安仔表示入行十多年期間，曾因感到太攰而有意退出娛樂圈，他更一度在台上感觸落淚。
許志安前晚在灣仔會展舉行《真城安哥對唱音樂會》，並邀請譚詠麟（阿倫）、葉德嫻及陳慧琳等出任嘉賓。身穿黑色西裝、胸前掛上一條鎖鏈的安仔，打扮充滿ＳＭ味道，他一出場即大玩咪嘴獻唱《傲骨》，原來阿倫在幕後為他代唱。
其後阿倫索性走到台前與安仔鬥唱鬥跳，他語重心長地說：「專登嚟睇你，你呢排是非多，睇你有冇咪嘴！呢件衫係你嘅枷鎖（指胸前鎖鏈），你有解唔開嘅情結。」安仔聽罷即一臉尷尬。
安仔表示曾因感到太攰而想過退出娛樂圈，他說：「我諗過攞晒銀行啲錢出嚟，然後孭背囊走咗去，自己要求高，不過𠵱家學識放鬆，我唱咁耐，唔算靚仔，唱歌又唔係最好一個，自己冇乜嘢好要求，由今日開始，雖然有媒體誤會我、有雜誌攻擊我，但我乜都唔怕，我會做番自己，因為有你哋支持。」安仔說罷更幾度感觸落淚。
及後記者問安仔一度想退出娛樂圈，是否因為當年未能奪取男歌手獎，他否認說：「贏咗就輸得起，呢個係我做人座右銘。」提到近日已故歌后梅艷芳的MuiMusic公司被現代美容入稟追數，安仔無奈地說：「商業上有咁嘅行動係正確，但人情上嚟講實在過份咗。」
此外，有消息指無綫台慶亮燈當晚，安仔、古巨基及李克勤均獲邀出任表演嘉賓，故此他們大有機會在無綫頒獎禮上奪取男歌手獎，對此阿倫說：「應該加埋梁漢文，戥番勻好啲，我估爭奪女主角（指無綫台慶）有兩個，如果四個歌手一齊攞獎，咁係咪好玩啲？如果唔係出年又多一件嚟爭，Eason湊完女之後，出年一定衝刺㗎。」
採訪：駱華齡 攝影：陳偉權
