前日一眾紅星名人齊集蘇格蘭著名嘅聖安德魯斯高爾夫球場，原來佢哋係參加登喜路高球賽第一日賽事。呢個比賽嘅賽制係由職業球手夥拍業餘球手，所以一班影星包括曉格蘭特（HughGrant）、奇雲高士拿（KevinCostner）同佢老婆姬絲汀芭嘉娜（ChristineBaumgartner）同埋米高德格拉斯（MichaelDouglas）等都有機會一展身手。
曾經跟過名球手蒙哥馬利（ColinMontgomerie）學打波、重盛傳搞到佢婚姻破裂嘅曉格蘭特，亦咁啱同師傅喺同一賽事度碰頭，不過阿曉嘅球技當然比師傅差幾皮喇。蒙哥馬利夥拍名模JodieKidd喺首日嘅賽事已經名列前茅，分分鐘有機會染指冠軍㖭。
而選擇喺蘇格蘭度蜜月三星期嘅奇雲同姬絲汀，今次嚟係志在參與同享受吓比賽嘅氣氛，所以姬絲汀全日打出九十五桿嘅成績都唔介意，而奇雲就沿途同啲fans有講有笑，其間佢覺得肚餓重走去小食部食咗隻熱狗，但係就屈記者畀錢！奇雲又透露佢哋會去釣魚，遲啲可能會去埋加勒比海潛水㖭。