印尼駐巴黎大使館門外發生爆炸事件，主角嘅印尼股市冇跌有升，嚇親反為喺港股，恒指最低13186，散136點，埋單13241，唔見80點，形勢唔算壞。隔晚美股唔妥，港股早段曾經升過，應該代表市底實淨。有滙控（005）做住定海神針，冇有怕。
中移動C輪：恒指唔見嘅80.3，中移動（941）跌45仙，佔咗28.5。大市上上落落，中移動亦係，候低炒C輪。如果係自命醒目過人，則吼高揸P輪，不過只合非常專業者玩。
喺低位可諗吓嘅中移動C輪，有9854同9813。9854下月1日到期，輪價10.1仙，溢價1.7%，槓桿率23.4倍（有效15.8倍），引伸波幅26.4%。時日無多，槓桿率勁大，有心理準備大升大跌，例如上月10日至22日，只係用咗8日時間，由最低8.6仙飛上20.6仙，升140%，跟住只係再用5日時間，散落7.5仙，跌64%。如果唔想炒得咁飛沙走石，則揀9813，12月初到期，啲數據喺走勢圖裏面。
新地P輪：新地（016）最高75.25元，最低73.75元，收74.25元，微跌1格，喺大波動市況中尚算穩定。
新地P輪2280，係所有新地窩輪中最多買賣嘅。1日成交170球，佔發行量250球接近7成，可見幾多人日中炒上炒落，執幾格走人，輸幾格又走人。最高24.4仙，最低21.3仙，收23.2仙，只有進帳兩格。明年3月到期，溢價15.6%，槓桿率32倍（有效7.6倍），引伸波幅31.3%。新地睇上多過睇落，隻輪博唔過。
章盛