港股噚日早段重炒得好哋哋，但12點後失驚無神急跌，搞到雞飛狗跳。經紀陳話，大市唔跌嘅話，又點樣可以趁低吸納呢？
其實噚日重有好多股份逆市上升，好似新濠國際（200）咁，無視大市下跌，再升21.28%，收5.70元，真係唔到你唔服。
另外一隻就係早排大股東曾作小量減持嘅YGM貿易（375），股價企硬不特止，重在跌市之中創出收市新高。雖然市場一直盛傳隻股會配股集資，但正如經紀黃早排所講，大股東剛減持完，照計唔會在短期內搞集資。經紀黃話，江湖傳聞有人想股價再高啲先至諗批股集資嘅問題。
YGM噚日最高見過10.90元，收10.70元，升13.38%，成交股數221萬股，金額2350萬元。
另外，同樣係搞製衣嘅聯泰控股（311），早排公布中期業績盈利倒退，股價一度回落至3.80元水平，但冇幾耐就升回4元樓上。經紀黃話，原來人哋剛剛去過美國搞路演，有芬佬對佢表示興趣。
聯泰噚日跟隨大市回落，股價下跌3.96%，收4.25元，成交股數234萬股，金額1004萬元。
慕容小初