官恩娜（Ella）憑健康形象獲皮鞋店舖垂青，不僅讓她任揀鞋子，還為她度身訂做高跟長靴。原來Ella很重視鞋子，更愛以此來揀選男友，皆因Ella認為男性穿着乾淨整潔的鞋，可反映其性格及品味。
擁有一雙修長美腿的官恩娜，最近獲一間專門為客人度身製造皮鞋的店舖「shoegirl」贊助，為她訂做高跟長boots，Ella當然滿心歡喜，她日前說：「梗係開心啦！我覺得鞋係好重要㗎，一個人靚唔靚都同對鞋好有關係。」
對Ella來說，一雙美麗的鞋子除了用來扮靚外，更是一種為她帶來幸福的恩物。原來Ella結識異性時，總會先看看對方所穿的鞋子。
Ella笑說：「我睇男仔就一定會睇吓佢對鞋先，因為我覺得鞋係可以反映出一個人嘅性格同品味，譬如我見到個男仔着到西裝骨骨，但係對鞋污糟邋遢，我都會即時走開，唔會同佢做朋友；相反見到一個人着對乾淨嘅鞋，即係代表佢個人企理，咁就算係合格，我就會理解佢多啲。」
Ella入行以來工作不斷，令她透不過氣來，為了紓緩壓力，Ella日前抽空到銅鑼灣鞋舖搜羅心頭好，雖然抱病在身，但因很久沒有購物，故此她見到滿布地上的鞋子，即時開心不已。
談到穿鞋心得，Ella更是滔滔不絕，她說：「我鍾意着高踭鞋，因為着咗個身形會靚啲，不過着高踭鞋好辛苦，好彩今年興番圓頭鞋，舒服好多，咁就唔使再受苦啦！」
採訪：羅慧敏 攝影：何國豪
服裝提供：MAX&Co.
