蒙嘉慧首次拍攝驚慄片，在新戲《噩夢》中飾演被噩夢纏身最後精神失常的記者，拍攝時她試過狂哭後收不到掣，嚇怕拍檔梁漢文。
蒙嘉慧、谷祖琳、梁漢文（梁炳）、唐文龍和羅蘭等主演的新片《噩夢》，將於本月二十一日重陽節檔期上畫。故事講述蒙嘉慧飾演的記者在這十多年來，每晚發着同一噩夢，她尋找真相時竟發現局中有局，令她和身邊的朋友、情人開始懷疑自己的身份，是一套驚嚇作品。
蒙嘉慧自小最怕看驚慄片，尤其是失驚無神嚇你一驚的場面，有時迫不得已陪朋友看後，更試過被噩夢嚇醒痛哭。故她接到劇本時曾考慮拒拍。
蒙嘉慧說：「我演戲多年，未試過拍一部真正驚嚇嘅恐怖片，我好怕自己拍攝期間過份投入，會泥足深陷抽唔到身。但係我睇晒劇本之後，覺得好有發揮，由正常演到失常，最後係擲硬幣『公字』決定拍唔拍，上天都認為我應該接咁就接啦。」
戲中蒙嘉慧十多年來晚晚都發噩夢，遇上連場怪事後，整個人更神經錯亂，嚴重失常，會聲嘶力竭地大哭大鬧。蒙嘉慧說：「我每日埋位都喺最緊張嘅精神狀態，大吵大鬧完就好攰。」蒙嘉慧續說：「試過有場戲，講我以為自己俾鬼上身，即時衝到鏡前發癲，梁漢文同唐文龍見狀合力制止我，之後我就嚎哭。導演大嗌cut後，我重愈喊愈勁，成個人震晒。梁漢文見到我咁好驚，立即問場務攞杯熱茶，等我鎮定落嚟。
「第二日我有去睇醫生，佢話我over-tense（過份緊張），好彩放咗一日假就冇事。今次係好寶貴嘅經驗，我學識點樣控制自己嘅情緒，亦知道拍驚慄片並非想像中咁容易，希望我嘅演技會得到大家認同。」
