新一屆立法會出咗三大惡人，加埋劉慧卿，已經湊夠「四大」，連衝動派掌門人大嚿陳偉業都自歎不如，雖然風頭俾長毛搶晒，但係大嚿仍然好大方，自願坐喺長毛旁邊幫吓呢位新丁手。
陳偉業同八方爆料話，長毛宣誓遲到，坐喺佢哋隔籬嘅自由黨徒忽發奇想，講笑話不如喺長毛杯水放兩粒安眠藥，等佢瞓着咗唔可以亂叫一通；大嚿就話長毛𠵱家需要鎮靜劑多啲，講兩講，長毛已經入咗場，做唔到手腳。
長毛梗係唔知立法會規矩，大嚿形容佢矇查查，好似人哋黃宜弘同卿姐爭做財會主席，但就舉手想質問有關財赤嘅問題，大嚿聽到就向佢解釋呢啲唔係財委會嘅職責，於是佢收番唔問。
當然長毛係個聰明人，大嚿話佢應該好快上手。黃宜弘喺大嚿同長毛左右夾攻下輸咗，民主派都唔知幾心涼，大嚿就更high，因為佢位好少露面嘅嬌妻都嚟睇佢宣誓，而入立法會之前，更有個小學生問佢攞簽名留念，真掂。
（圖）小學生fans問咗陳偉業攞簽名。
傳真︰2623-9278
電郵︰