車路士前鋒梅度公開炮轟領隊摩連奴，睇嚟一月轉會期重開時，「車仔」勢賣走呢位羅馬尼亞球星；咁樣一博，呢鋪梅度可能係贏家，如果成功過檔其他球隊，憑佢嘅實力唔難搵到另一個春天。輸家呢？反而可能係維拉？！
相信梅度由現在起，都唔使諗喺「車仔」再有上陣機會，得番杜奧巴、基斯文及古莊臣三位前鋒可用，喺又要踢聯賽又要踢盃賽情況下，又要等到一月至可以買人，點算呢？英國《太陽報》就話，「車仔」已準備援引合約內條例，好可能即時回收番外借畀維拉嘅英格蘭小國腳前鋒C高爾。
咁就輪到維拉頭痕嘞，主力正選入面少咗C高爾，得番安祖及華素爾可用，你話維拉係咪呢鋪輸家呢？
樸茨茅夫條防線亦同巴塞隆拿一樣，傷兵愈嚟愈多，兵源告急。領隊哈利列納就準備打沙維亞呢位前葡萄牙國腳主意。記得歐洲國家盃時，我求大俠喺葡萄牙撞到沙維亞，當時佢就話有好多球會斟緊，點知最後揀擇得滯，到𠵱家都冇班落。難得重有個咁嘅機會，咪錯過嘞老友。
巴塞隆拿個傷兵名單愈嚟愈長；轉會期又過咗，想增兵都要等到一月。不過自由身球員不在此限，於是佢哋就準備向法國老兵迪西里埋手。不過呢季冇班落嘅迪西里，目前處於半退休狀態，重有冇能力同你守好個後防呀？與其係咁，你教練列卡特自己操番一輪落場踢都得啦。
水晶宮前鋒安迪莊臣啱啱同球會續簽一紙五年新約，現年二十三歲嘅佢，似乎準備將最好嘅時間都畀晒水晶宮；講清楚少少，應該係佢想將最好嘅時間畀晒領隊杜維就真。原來佢係見球會最近同杜維續新約，知道呢位恩師會繼續留隊，自己先至肯簽新約，認真有情有義。
葡萄牙中場維亞拿今季由紐卡素外借士砵亭，條款係前教練卜比笠臣訂定，講明不許倒戈上陣，點知兩隊真係喺足協盃分組賽抽埋同一組！維亞拿希望「紐記」容許佢代表士砵亭上陣；但舊年路亞就係外借去樸茨茅夫，然後喺聯賽入波擊敗紐卡素，你話「紐記」肯唔肯呢？