廣生行荃灣楊屋道服務式住宅，月底推出，噚日公布，命名為「樂悠居」indihome。
由房協過檔華置做營業經理、負責今次賣樓嘅柯靄邦解釋，中文名代表快樂悠然嘅居所，而英文名就包含individual嘅意思，即係樓盤以單身貴族、年輕人為對象。
柯靄邦話，樂悠居有十呎十吋樓底，又可以用明火煮食，唔怕同爵悅庭比較。
另外，長實竭力將前身係虎豹別墅嘅重建項目，打造成大坑豪宅，重叫做「名門」，英文名TheLegend，凸顯豪氣之外，又蘊含歷史味。
樓市熱火朝天，新盤賣價屢創新高，利嘉閣廖偉強話，九倉深井碧堤半島二期，唔單止本地人追捧，噚日有印尼華僑，用近千七萬，買入第二座七十一樓高層相連戶，二千二百幾呎，每呎七千四，創開賣以嚟新高價。
九倉黃光耀話，因應大單位需求增加，下個禮拜二賣地後，先解封第二座逾六十樓約六十個高層，市值兩億。聽日加推二座五十六及五十七樓十六伙，呎價三千八至四千五。今個月內，透過利嘉閣買特色單位，可獲雙人十天旅遊優惠，名額三個，總值七萬。
以前淨係居屋可以做到較高按揭成數，所以唔夠錢畀首期嘅，惟有買居屋，但自從九成半按揭普及，居屋變得冇咁矜貴，成交逆市收縮。
利嘉閣表示，居屋二手買賣登記上月只有四百七十七宗，比八月減近五巴仙。
利嘉閣何紹章話，連專炒居屋嘅炒家，都轉投火熱嘅私樓市場，估計未來數月，居屋二手交投續減。
不過，其間也有啲熱門屋苑，成交不減反增，好似屯門兆康苑，有二十三宗登記，比八月增近一倍六。
同區新圍苑就有十宗，增倍半。
香港人買樓好簡單，鍾意就買，但入伙收樓嘅時候，有啲變得頭都大埋，因為執漏同維修非常煩，所以代客驗樓服務應運而生。呢行生意愈嚟愈好做，真係「瘦田冇人耕，耕開有人爭」。
日進測量師行宣布推出「專業驗樓服務」，由註冊建築師負責，收費以建築面積計，每呎兩蚊，服務包括收樓時檢驗天花、牆身、地台、大門、窗戶、窗台板等狀況，睇吓有冇問題，咁客戶就可以安心收樓啦。
蘭西
電郵地址：
