澳門概念持續熱炒，經紀黃早前講過嘅新濠國際（200），股價一升再升，噚日再創新高，升5.6%，收4.70元，成交股數656萬股，金額3016萬元。
至於同屬賭王麾下的信德（242），早前被芬佬沽過一輪後，亦重拾升軌，噚日升4.65%，收4.50元，成交股數1756萬股，金額7822萬元，回升接近公布業績前的高位。
經紀黃話，芬佬當日沽貨，主要係見到賭王將有關賭博嘅生意分畀阿女同阿仔負責，怕信德的賭業概念開始淡出。據聞有關人等極力否認，話稍後將有新計劃出籠，所以近期股價先至造番好。
賭業概念股炒得最勁，莫過於大股東同樣在澳門搞賭場的嘉華國際（173）同埋嘉華建材（027），尤其後者就更加升到你唔信，短時間內由0.80元水平升到噚日收市1.85元。
經紀陳話市場盛傳嘉華系有大動作，甚至傳出可能將賭場業務注入嘉華建材，但佢就覺得可能性唔大，皆因隻殼實在太細，未必食得落咁大茶飯，而且過往亦傳過好幾次，但始終未見有動作，跟風炒作者，小心，小心。
慕容小初