前綫召集人卿姐擊敗黃中指，無啦啦做咗立法會財務委員會主席，救咗立法會嘅形象一命。其實卿姐做到主席，鄭大班功不可沒，除咗幫卿姐拉多六票，當長毛重好興奮咁開記者會講誓詞，大班即刻的返長毛入議事堂，叫佢投票支持卿姐。
卿姐操控政府嘅財政大權，搞到官場人人風聲鶴唳。卿姐喺電台講，周身唔得閒嘅唐唐同埋馬時亨前日第一時間畀電話佢，當時叫佢哋話畀啲政府官員知，「劉慧卿唔係殺人王！」卿姐重話，佢做嘢有商有量，話一就一、話二就二，「見人講個句，見鬼都係講個句」，日後佢一定會睇實，唔會畀啲同事開啲簽咗名又冇寫銀碼嘅支票畀政府，唔畀政府再搞啲「維港巨星匯」。
財會屬下重有兩個小組，一個睇住人事編制，一個昅住工務工程，財會就把最後一關。財會嘅慣例係主席唔會坐埋呢兩個小組，不過卿姐好鬼勤力，佢好希望可以破例畀佢坐埋呢兩個會，咁樣可以再昅緊啲政府做乜。
（圖）唐英年（右）日忙夜忙，噚日傍晚又去咗韓國國慶酒會，向剛到任不足一個月嘅新總領事趙煥復（左）道賀。
傳真︰2623-9278
電郵︰