阿胡喺十一前夕召見董團夥，高調訓令阿董要「提高管治水平」，同自己中方嘅「提高執政能力」掛鈎，即是話若然董團夥嘅「管治水平」維持七年來嘅劣質狀態，就連阿胡所講嘅「提高執政能力」都俾佢影衰搞臭埋，用詞之嚴、用語之重，可見胡溫內心對董團夥經已係震怒萬分。
點知阿董呢頭領咗旨，嗰頭返港，管治水平一樣冇提高。衞生福利及食物局局長楊永強，七月七日經已正式提出請辭，三個月生效，日前正式期滿，阿董都重未宣布到邊個接頂！
呢啲凡事慢九拍嘅陋習，七年來香港人見到慣！三司十一局人選一拖再拖、7.1大遊行之後迴避公眾唔回應，淨係識講「早晨」，到𠵱家小強辭職，一早畀晒通知，又係遲遲未搵到人選，傳就傳咗好耐，話有個叫周一嶽嘅代替，但呢個周一嶽，就做咗元朗山貝河一小鱷，一味長期潛水未蒲頭，係咪要納稅人夾錢，請個「捉嶽專家」，硬性夾住佢上岸？
有說「嶽仔」揸澳洲護照，雖然份屬黃種，可惜唔係中國人，要等澳洲政府批准佢退回護照，完成基因還原手續，先至可以同剩番兩年零嘅董團夥效力！
不過，人哋大班當初夠係加拿大人，一聲參選，退回加拿大護照，打個IDD，加拿大政府即時做嘢搞掂。大班係民間人士，無權無勢，尚且點得郁加拿大總理及外交部長，董團夥以政府之力，向澳洲交涉，應該五分鐘就搞得掂，何況阿董「國際人脈」據說好廣泛，拖到今日，唔通跛腳鴨到咁，連澳洲政府都唔畀面佢？後來，又話唔係阿嶽個人問題。
事實清楚，不容抵賴，連一個衞生福利及食物局局長嘅任命，都一拖再拖，無從「行政主導」，又點怪得大班入咗立法會，立法機構就變咗強勢？唔係泛民主派想癱瘓政府，而係呢個小兒麻痹政府早已自我癱瘓。除非有一個合理解釋，例如：個名一早交咗上去畀胡溫，胡溫一睇，以為叫做「周一山獄」，首先懷疑係咪日本人，跟住覺得個名叫做「周一嶽」，而伸出手指數一數，祖國總共有泰山、華山、嵩山等「五嶽」，胡溫想搞清楚，重有四嶽究竟去咗邊，有冇人涉及分裂祖國國土嘅陰謀，正在深入調查緊，所以唔批住。
若然係阿胡整蠱阿董，咁團夥就不妨公布，若然唔係，就點怪得長毛一入立法會就要摑醒呢個政府？提高管治水平？有名你叫，大吉利是，周一嶽事件變咗「周一鑊」，每周至少搞出一鑊嘢，長毛入到立法會，睇怕都可以遵照「周一嶽精神」，一個星期大鬧立法會一鑊咯。
傳真︰2623-9278
電郵︰