上年憑《美國黐GUN檔案》獲奧斯卡最佳紀錄片嘅導演米高摩亞（MichaelMoore），領獎時大鬧美國總統喬治布殊，引嚟好大迴響，如今佢喺《華氏9/11》入面，更加將布殊彈到體無完膚，重一心要踢佢落台㖭，而呢套戲下星期四就會喺香港上畫。
米高喺套戲度以嬉笑怒罵方式，諷刺布殊當選後搞到國家一鑊泡，而且九一一發生嗰時，正喺學校探訪嘅布殊得知消息後，揸住本書發呆咗七分幾鐘。米高話佢反應奇慢之餘，重寸佢梗係後悔以前唔努力做嘢，將啲時間花晒去農場除草同打高爾夫球！米高又話唔知點解次次有大事發生，布殊都走咗去度假，重話布殊家族同拉登家族有密切關係㖭！
除此之外，米高亦透過訪問軍人同埋佢哋嘅家屬，帶出戰爭對國人嘅傷害。其中一位去過伊拉克打仗嘅士兵話佢好討厭戰爭，而另外一位女士就好傷心，因為佢個仔喺伊拉克戰死。
呢套《華氏9/11》係史上首部榮獲康城影展金棕櫚獎嘅紀錄片，至今全球票房已經收咗超過兩億美元（約十五億六千萬港元），加上DVD同錄影帶只係出咗一日已經賣咗二百萬套，勢將成為史上最好賣嘅紀錄片，當初投資六百萬美元（約四千七百萬港元）嘅Miramax真係賺到笑。
另外，米高早前喺密歇根州嘅大學演講時，送咗啲底衫褲同食物畀學生，結果當地共和黨話要指控佢賄賂啲學生去投票喎。