噚晚係香港大學利瑪竇宿舍七十五周年大日子，一班oldboys濟濟一堂返港大敍舊，當然唔少得Ricci仔黃宏發同張永霖，連St.John's堂友廖秀冬、楊森同馬時亨都有出席hightable湊高興。
啲政壇校友真係麻麻煩煩，飲大兩杯就開始嚟料。大會安排幾位猛料校友上台吹水，點知楊森同發叔吹水吹出火，楊森講起，港大學生宿舍應該學中大咁「四年一宿」，發叔唔贊成，驚住影響各大堂舍嘅多年道行，如果學生有需要嘅，可以起啲類似酒店式日本棺材嘅睡籠出租畀學生。楊森批評Ricci舊生玩新生嘅傳統係羞辱同學，發叔把幾火，窒番楊森轉頭：「你哋民主黨就真係四年一縮嘞。」台上台下笑到楊森面都黃埋。
St.John's仔同Ricci仔新仇舊恨，身為St.John's老大哥嘅楊森呢晚竟然公開道謝Ricci。原來楊森當年係St.John's足球隊隊長，有場波對住Ricci，畀對方一個無敵較剪腳剪斷咗隻腳，要入院駁番。當時嘅楊森係火紅青年，又踢波，又搞學運，有位教授趁佢冇幾何靜落來，就拎住成大叠書去醫院探佢，叫佢畀心機讀書好過，楊森好似受到感召咁，真係忽然發憤，最後重攞埋獎學金去英國深造，佢噚晚話，諗番轉頭，真係多得Ricci嗰位較剪腳。
傳真︰2623-9278
電郵︰
