新一屆立法會開鑼，又係啲議員交利益申報嘅時候，原來唔少人都收咗班地產佬捐款，除咗劉千石收咗長實趙國雄一萬蚊之外，原來立法會主席范徐麗泰都收咗中信榮智健、鄭裕彤慈善基金會、中華製漆、恒基財務各十萬，至於李嘉誠就重唔話得，分別用長實、長江基建、港燈、和黃一齊夾埋捐十萬，加加埋埋佢收咗地產佬幾十萬，都咪話唔和味！不過生意佬捐錢，邊有死錯人，睇下范太做主席，唔只愛國愛港報紙頭版報道，連中央台新聞聯播都播，就可以知范太喺中央心目中地位，分分鐘范太真係做埋第三屆特首，到時呢十萬八萬「投資回報」真係好過拎去買六合彩，所以八方成日話，商界唔使怕直選立法會同特首，學美國佬咁搞多啲政治捐獻，回報下民主制度，就想邊個當選都得，唔好淨係掛住貢獻祖國！
（圖）立法會宣誓喺香港係大新聞，不過到國內電視台就只係播范太做主席嗰段。
傳真︰2623-9278
電郵︰