佘詩曼在剛播完的劇集《金枝慾孽》中，扮演攻於心計的爾淳，阿佘坦言入行七年來多演忠角，曾擔心fans不能接受她扮演奸角，沒想到觀眾十分受落兼且收視破紀錄，令她感到能接拍《金》劇可算無憾。
無綫劇集《金枝慾孽》已於上周播映完畢，劇集大結局的平均收視高達三十九點，即約有二百七十萬觀眾捧場。劇中四位女主角佘詩曼、鄧萃雯、張可頤及黎姿扮演後宮妃嬪，為爭寵你虞我詐，鬥得精采激烈，阿佘過往多扮演忠角，這次在《金》劇中卻飾演攻於心計的爾淳，她坦言開拍之初曾十分擔心。
阿佘日前在銅鑼灣接受本報訪問時說：「我曾經擔心過，儲咗七年嘅fans會冇晒，但我冇諗過唔接，始終演員應該作多方面嘗試，其實我亦有諗過去做一啲嘢去保護角色，例如唔好奸得咁盡，後來都係覺得如果勒住勒住，出嚟嘅效果唔係嗰樣嘢，結果我𠵱家可以鬆一口氣啦。」阿佘續說：「見到觀眾嘅反應同收視咁好，好感動㗎，暫時喺我嘅演藝事業上嚟講，拍到呢個劇係無憾。」
而因《金》劇四位女角均表現不俗，相信四人在下月中舉行的無綫台慶頒獎禮上，為爭「我最喜愛的女主角」獎又將有一番惡鬥，對此阿佘說：「盡力而為啦，競爭激烈㗎，因為個劇有四個女仔，候選名單就只得五個，重有其他劇集呢，但邊個攞我都開心。」問到阿佘較睇好哪一位女演員奪獎時，她說：「雯女（鄧萃雯）啦，佢做得好好，佢做妃子喺儀態上好有韻味，重好有氣勢，好有壓逼感。」
四女在鏡頭前爭餐飽，愈是做得好自然愈入戲，問到阿佘在鏡頭後又會否受情緒影響而對其他女角心懷恨意？她說：「演員要識抽身，冇roll機就停㗎啦，拍嘅時候係好笑至真，因為啲對白好難記，成日要出貓，我哋將啲稿黐咗喺窗簾度，其實係睇唔到，黐得太遠啦，但呢樣就好似司儀手上攞張卡一樣，安心啫，譬如鏡頭喺我前面，林保怡就將貓紙黐喺我背脊，我就將貓紙黐喺前面塊鏡度咁囉。」
採訪：朱倬誼 攝影：林德雄
服裝：SistyrMoon 場地：ChilliNSpice（CausewayBay）
