鄭秀文（Sammi）昨日到中環為新片《龍鳳鬥》接受記者訪問，該片已是Sammi第三度與劉德華合作，她坦言彼此間已培養出一份默契和信任，因此Sammi表示只要有好的劇本及角色，她不排除會再與劉德華合作。
對於華仔早前透露因暫時未找到一個令他信任的對手，故不欲接拍露股戲，怕自己有生理反應時對方不懂應付，Sammi笑道：「佢放心，我何德何能令佢有反應呀？其實我都冇呢個能耐。」問到她今次與華仔拍戲時有否感到對方有反應？Sammi即很大反應的說：「吓！我哋今次都有少少激吻，錫到碌落床，都錫咗成三、四十秒，拍嗰時都冇尷尬，有個咁靚仔嘅對手喎，拍得好開心。」
Sammi下月初將往上海逗留三個月，拍攝電影《長恨歌》，早前她已為該片試造型，她昨日坦言戲服旗袍需要加工才可有玲瓏浮凸的效果，Sammi笑說：「因為我平，張叔平又想要曲線美，我要加啲神奇胸圍同墊pat。」提到張可頤早前與張叔平為電視劇版《長恨歌》發生拗撬，Sammi說：「我相信係一個誤會，冇人會懷疑張叔平嘅審美觀，其他人要我墊我可能會驚，但阿叔要我墊就冇問題。」
此外，許志安早前接受曾志偉訪問時公開承認去年與Sammi分手，她昨日回應說：「我之前答過，我諗我唔答，我冇嘢講，但我身為藝人會覺得有啲報道唔啱。」問到她日後會否與安仔合作拍電影時，Sammi表示暫時沒有想過。
採訪：馮美茵
攝影：林德雄