恒指回升50，其中34.4係滙控（005）同中海油（883）所貢獻。油價再升，炒股佬唔當作一回事，個市估計反覆向上。
恒指C輪：睇好個市，可以直接揸恒指C輪，正路之選係「孖9孖1」。9911年底到期，收報20.8仙，升得兩格，嚴格講冇跟貼恒指，結果溢價由1.6%縮到1.3%，槓桿率14.9倍，因為溢價低之故，有效槓桿率10.7倍，夠晒爆炸，引伸波幅20%，唔高。如果大市忽然升300幾點，揸隻輪大約有3成利錢。
新地C輪：賣樓股信置（083）再升10仙，收6.40元，又創新高。新地（016）原地踏步，收74.50元，同年初高位80元比較，有5.50元水位。下周二賣地，如果話對地產股有刺激，則最受嘅應該係新地。新地C輪2151數據好靚，明年1月底到期，輪價73仙，溢價2.4%，槓桿率10.2倍，有效槓桿率7倍相當爆炸。用嚟炒，則2252比較啱啲，數據喺走勢圖裏面。
滙控C輪：周一推介滙控C輪4441，當日急升21%收52仙後，日日都係收52仙，等緊正股（005）畀「指示」。
滙控過去4日，收市價唔係125元就係125.5元，昨收125.5元，好似做緊支旗仔，稍等吓，有望上衝129元今年新高。4441明年6月尾到期，溢價2.9%，槓桿率24.2倍（有效11.9倍），引伸波幅只有14%。壽命長，溢價低，唔怕蝕溢價。明年滙控如果升上140-150元，隻輪會飛上1.16-2.61元，升幾多倍，自己計吓。
章盛