大家多數人都會以解像度區分數碼相機嘅等級，早陣子會以800萬像素為頂級機種，而500萬就係中級機種。不過最近DC界多咗一個層次──700萬像素級別，各大廠商都爭住推出，令到一般民用級嘅儍瓜機（全自動功能），都有超高相片解像度。今日就精選近期人氣至高嘅5款700萬像素級DC，就算大家未急住入市，都可掌握各新機優勝之處。
記者：許福合 攝影：陳陶鈞 ImageGirl：Don
1.用盡700萬像素嚟影相，每張相片容量超過2MB，一張128MB記憶卡只可影幾十張相，用家不妨選購較大容量嘅記憶卡，否則經常出現「入不敷支」情況。
2.民用機始終不及單鏡機，愈高解像嘅相片，儲存時間愈耐，耗電及記憶卡需求亦更大，對於急切拍攝環境反成負累。
3.除CCD解像度，選購DC不二法門係睇埋其他功能，如光學變焦倍數、廣角鏡範圍、閃燈熱靴、扭擰屏幕等，非齋睇賣相同價錢咁片面。
4.莫講話8R大相，一般500萬像素DC已可列印A4尺寸嘅相片，若非需要，暫仍毋須畀多筆去追700萬像素DC。
現時已經推出巿面嘅機種之中，Casio嘅P700可算係其中一部無論外形同功能，都屬於專業級嘅DC；黑色機身，夠份量又有型，背後配上2吋大芒，實用美觀兼備。功能方面，除咗解像度去到700萬像外，配上一支4倍光學變焦靚鏡，有齊晒專家要求，P/A/S/M模式都有齊，拍照時想點影就點影，唔會好似普通儍瓜機咁大限制。有時想偷懶，P600亦內置有多廿種場景拍攝模式，就可令用家輕鬆影得靚相。記憶卡選用咗現時最流行之一嘅SD/MMC卡，另外還內置有9MB容量，影爆卡後都可以支持多幾張。P700整體功能不俗，適合較高檔用家使用。
CasioP700Profile
解像度：720萬像素
光學變焦：4倍
記憶卡：SD/MMC
電池：專用鋰電
體積：98×68×45mm
重量：225g
Canon嘅G系列一向有唔少支持者，最新G6外形感覺較為新鮮，不過機背仍然用上扭芒設計，大小為2吋，並且可從機身伸展開來作270度轉向，同時因為屏幕質素唔錯，無論左扭右扭，仍可睇當清清楚楚，最正係可調校光暗，可因應環境而選擇，夠晒慳電。鏡頭相當於35-140mm，提供4倍光學變焦，最大光圈為F2.0，可見鏡頭質素唔錯！另外，拍攝模式多達12種，包括全手動操作、快門先決、光圈先決、兩種自設模式、人物及夜景等，簡簡單單就可影到人像加煙花等高難度相片。
CanonG6Profile
解像度：710萬像素
光學變焦：4倍
記憶卡：CFTypeI/II
電池：專用鋰電
體積：104.9×72.8×73.1mm
重量：380g
若然700萬像素重未能令你心動，Canon另一部S70相信可「廣」招用家，因為使用上28mm廣角鏡頭，可拍攝出視角更闊、角度更佳相片，當一班人大合照，又或要拍攝有氣勢風景照片，S70都可應付自如。而機身於同級相機之中，算係非常之輕巧，功能雖然未及G6般強勁，不過仍有齊手動及自動拍攝功能，加埋操作反應皆迅速，一機傍身，隨時都可以影靚相。
CanonS70Profile
解像度：710萬像素
光學變焦：3.6倍
記憶卡：CFTypeI/II
電池：專用鋰電
體積：114×56.5×38.8mm
重量：230g
PENTAX750Z為同級機種中少見嘅五倍光學變焦機種，加埋高達8倍數碼變焦能力，遠攝能力特別強，影相時包你唔使咁辛苦就位。LCD採用咗扭芒設計，可翻轉180o、上下則270o，自拍影人皆好用。750Z提供全手動、光圈優先、快門優先等操作模式，也提供咗PENTAX獨家嘅3D影像製作功能。可自製有趣過癮相片。
PENTAX750ZProfile
解像度：700萬像素
光學變焦：5倍
記憶卡：SD
電池：專用鋰電
體積：100×62×42mma
重量：210g
單從外表，有誰可估到SONYP150解像度可高達700萬像素呢？P150機身非常輕巧，重量更只有147g，外表同傳統P系列機款分別不大，但已配備「蔡司」鏡頭，提供3倍光學變焦，拍攝速度唔錯，可以連環拍攝5張700萬像素相片，功能以自動為主。P150可以放喺衫袋褲袋，可隨時拎出來影個痛快，SnapShot發燒友一流。
SONYP150Profile
解像度：720萬像素
光學變焦：3倍
記憶卡：MS
電池：專用鋰電
體積：108×51.5×26.6mm
重量：147g
DCFever
電話：28343112
地址：銅鑼灣伊利莎伯大廈5樓e電城A109-A110號