收到FCC通知話有免費戲票送，睇《華氏九一一》，歡喜咗一陣，原來只得五十張票，通訊員?記者會員優先，先到先得，有剩先至會派畀左丁山一類associatemember，點會輪得到呀。《華氏九一一》特別場喺明日下午四點在嘉禾港威電影院放映，呢套所謂紀錄片由著名反布殊分子MichaelMoore編導，已經成為克里競選總統嘅有力武器，賓架C早已在巴黎睇咗，佢話內容左穿右插，唔知邊句真，如果當係紀錄片，就唔及格，視之為電影，就幾過癮，特別適合克里支持者、恨布殊入骨之人。
呢啲免費飛無謂等，富翁V突然打電話嚟，要撲周杰倫演唱會門票。周杰倫，好似聽過喎，乜開演唱會咩？乜富翁V連周杰倫都鍾意咁追上潮流呀？富翁V話：「唔係我睇嘅，我都唔識佢，為咗下一代啫。」為人父母真可敬，下一代撲飛聽演唱會，都要出動老頭子。左丁山於是問秘書：「周杰倫幾時開演唱會呀？」秘書答：「睇吓《蘋果日報》廣告就知喇，我就知道好難好難好難買到飛。」睇清楚《蘋果》廣告，有計噃，眾多主辦協辦贊助機構之中，有熟人。於是打電話搵老友H，老友H話：「我自己都冇聽周杰倫，但我嘅仔女、仔女嘅同學，我嘅同學為咗仔女，全部向我撲飛，你叫我怎麼辦、怎麼辦？」
佢同學A個女，只係讀緊小六，日日叫老竇買飛睇周杰倫，話畀佢聽買唔到，即刻扁嘴扽地，於是媽咪又喝住：「爹哋，你點都要搵到兩張飛，等我陪阿女去呀！」同學A惟有放下面皮，挨老友H幫手幫手。
呢一輩真唔抵，自己要睇TheSeekers親自買飛，阿媽話要睇戲曲演唱、阿女話要睇周杰倫，又係自己出馬撲飛，幾時先至有人撲埋飛與我哋？