袁潔瑩日前喺中環KeeClub搞生日派對，近排嘅新聞女王李麗珍亦有出席，重飲到啤啤夫先走，原來當晚除咗佢嘅前男友祁文傑在場，另一個前男友錢嘉樂都喺度，珍妹飲醉咗重冚咗嘉樂仔四巴，嚇到在場嘅人眼定定。
據二五仔報料，嗰晚蔡一傑、李蕙敏、肥媽、Nelson、許志安、陳淑蘭等成班人都見到事發經過，珍妹醉得好緊要，走埋去叫嘉樂仔陪佢飲酒猜拳，嘉樂仔話飲咗好多唔想再飲，點知珍妹就一巴冚落佢度，出手都幾重吓。珍妹打完人重喺度笑，嘉樂仔當住咁多人面前，惟有話自己係男人，唔同女人計較囉。點知話口未完，珍妹又一巴摑落嚟，嗰晚前前後後，嘉樂仔總共俾珍妹冚咗四巴，但佢都咕一聲吞咗佢。
雖然珍妹同佢拍過拖，但已經係N年前嘅事啦，何況佢𠵱家嘅女友係李珊珊，無端端要人哋硬食幾嘢，好冇品啫！記者問過嘉樂仔呢件事，佢話冇啲人傳得咁誇張，佢同珍妹當晚玩得好開心，重話珍妹打佢都係「你好衰㗎」嗰隻咋喎。
譚詠麟噚日接受港台嘅《開心日報》電話訪問，講到有關最近徐小鳳嘅演唱會可能會效法佢同克勤嘅「左麟右李」，搵個拍檔合作，阿倫聽到唔單止唔介意，重開心到不得了，又話希望可以齊齊合作咁話。而阿倫重幫小鳳姐搵到三組合適人選，比較嫩嘅就有關心妍同何韻詩，中層就有陳慧嫻，另外一個就。
萬綺雯噚日為亞視新劇《爸爸兩邊走》試造型，佢喺入面飾演一名來自內地、教琴嘅弱視女子，而男主角就係剛回巢嘅林韋辰。萬綺雯話佢讀小學嗰陣已經開始有近視，問佢會唔會考慮做激光手術，佢話：「有呀，人哋話夏天做效果唔好，但我秋冬又唔得閒。」又問到有冇同好友尹天照聯絡，佢就話：「等佢搞掂啲嘢先啦。」
江芷妮噚日去咗尖沙嘴幫一間纖體公司舉行嘅活動做司儀，原來江芷妮嘅身體一直都唔係咁好，成日無端端會病。不過佢最近聽纖體公司個老闆畀嘅意見，不時飲用中藥嚟調理身體，結果佢真係比以前健康咗好多。而今次纖體老闆就咁搵咗佢嚟做司儀兼嘉賓，分享吓啲經歷，而今次江芷妮重有車馬費㖭。
今年嘅《第四十一屆金馬獎》噚日舉行第一次評審會議，推選咗香港導演許鞍華做評審團主席，許鞍華第一次做金馬獎評審份外緊張，佢話：「以前做香港金像獎評審，電影睇完一次就唔會再睇，今年唔同，睇過嘅我會再睇多次，唔可以打印象分。」除咗佢之外，評審會重有王麗莎、石雋、陳勝昌及日本導演東陽一等人。
鄧梓峰早排去咗日本為健康食品擔任代言人，佢一人分飾飛機師、打工仔、司儀等多個角色，又同兩、三歲嘅小演員合作。鄧梓峰已有四個仔女，湊仔經驗豐富，唔使出動到玩具同埋零食，隨手一抱已經𠱁得小演員鬼死咁開心，真係佩服、佩服。
