【本報訊】「長毛」梁國雄昨日身穿無領T恤及牛仔褲走入立法會宣誓，會後更直闖主席范徐麗泰的記者會，雙方就議員開會服飾問題辯論約半小時。長毛表明不會改變衣着品味，「我係一個平民，平民着乜衫投票，我就着乜衫開會。」范太堅持不會改變一貫對議員衣着莊重的要求，指長毛要破戒必須先獲得其他議員支持。
當立法會議員宣誓後，主席范徐麗泰曾向長毛提出私下會面，長毛卻跑到立法會大樓外參與示威，但在范太舉行記者會期間又突然「踩場」。范太強調議員衣着莊重這規定由來已久，隨便更改對其他議員不公平。
長毛反駁說：「呢個問題唔可以用民主方法解決，因為係個人品味問題。呢度唔係中學，唔使着制服。」他又指精英政治時代已結束，要求議員冠冕堂皇不合時宜，「已經係廿一世紀，八十年代委任議員時代已經一去不返嘞。」
范徐麗泰強調議員服飾應appropiate（恰當），長毛回應：「乜嘢係appropiate？係你個人判斷，我只係想保留着衫自由嘅權利。」他又指人大代表開會也可穿上色彩鮮豔的衣服。范太沒好氣地說：「人哋着嘅係民族服裝嚟㗎。」長毛在自行召開的記者會上解釋，堅持穿T恤開會是回應選民要求，「我係由好多着T恤嘅人選出嚟，范太想教人點着衫，應該返屋企教佢啲仔女，佢教我着衫？我叫佢去青山。」