十世冇出銅鑼行夜街，上星期趁着長假期，諗住好多人上咗深圳或出外旅遊，銅鑼灣或者會清靜啲，於是揸車去銅鑼灣，泊低架車喺馬會停車場，行出去時代廣場，嘩，不得了，啲自由行遊客塞滿晒，啲電器店認真好景。
行行吓，肚仔餓，本想行去「爛撻撻」或者「西苑」睇吓有冇位，手機忽響，大記者來電：「我哋喺『小肥羊』食火鍋，有興趣就嚟。」小肥羊究竟係乜？唔知，於是跟大記者指示，走上銅鑼灣廣場二期，唉吔，又係人山人海，好彩大記者早已有位，唔使等，安樂晒。記者食飯都好似做採訪，捉住個經理猛咁問：「小肥羊係國企定民企？發展大計如何？食涮羊肉有乜咁特別，竟然招徠咁多顧客？」一輪嘴之下，經理來一次「路演」，簡介「小肥羊」嘅歷史、由來，神奇湯底不含雞精、味精，內含六十四種材料等等，最後講到希望幾時上市。國內企業認真有朝氣，來港開咗一間分店，生意旺場，就諗住幾時做IPO，一分鐘不能停下來！睇怕將來股票之中，除咗有蒙牛之外，「蒙肥羊」一於與「蒙牛」爭一時瑜亮。
大記者、小編導、總採主等等老人邊食邊讚，食涮蒙羊而冇腐乳醬（因為經理堅持話冇需要，健康啲喎），左丁山都係第一次，味道的確唔同。新店開張不久，確有一手，但半年之後是否可以維持水準及服務水平，就係大挑戰。幾間上海名店來港開舖，都係巴閉咗幾個月啫，之後就香港化，平平無奇。食食吓，諗起特區政府要求內地開放民企自由行，真係笑話，內地企業，能夠嚟嘅，使政府去推動咩，一早落咗嚟，佢哋遲早攻陷香港，橫掃本地飲食業！