無綫每年台慶都例牌搞成個月，下星期二就會做亮燈儀式，除咗由六叔邵逸夫主持亮燈外，年年都會搵啲一線歌手做表演嘉賓，有幸被選中嘅歌星，通常都會喺年尾頒獎禮攞大獎，上年嘅成功例子就係李克勤同陳慧琳嘞。
馮仁昭八到，今年TVB就搵咗許志安、李克勤同古巨基一齊做亮燈騷嘅表演嘉賓，實行將三位最有機會得男歌手獎嘅歌星擺埋一齊，等大家估下邊個攞大獎。
睇走勢，克勤挾上年得獎嘅氣勢，今年賣碟成績亦唔算差，但就未有一首好似《高妹》咁大熱嘅歌；而安仔嘅事業雖然一直倒退，不過佢唱片公司依然好努力幫佢爭取，所以未必輸得晒；至於基仔上年走勢唔錯，但起步遲，今年全力喺樂壇發展，佢嗰首《大雄》同近期嘅《愛與誠》都幾受歡迎，碟亦好賣，但佢一路屬於二線，唔知TVB會唔會捧佢上一線呢？
至於女歌手方面，楊千嬅掛住拍戲，陳慧琳又未有起色，今年睇怕都係容祖兒，可惜佢都重未有大熱嘅歌，唔知係咪因為咁，TVB先唔搵女歌手做亮燈騷。嚟緊祖兒會同克勤合唱，想互撐人氣，聽講基仔都會同千嬅合唱。睇嚟呢兩pair男女歌手都會有一番惡鬥。
周慧敏噚日喺台灣亮相電視節目，當地嘅傳媒對佢嘅感情事好有興趣，猛問佢同倪震係咪已經秘密結婚，周慧敏即刻否認，重話結婚證書唔重要。主持人張小燕又問佢會唔會奉子成婚？周慧敏就點頭，但強調佢同男友都唔想生兒育女喎。
許鞍華噚日去咗浸會大學做客席講師，講嘅題目係「香港文學的影像世界」。許鞍華之前拍過唔少受人讚賞嘅戲，問佢覺得《金枝慾孽》拍成點？佢就話：「正㗎！幾個女人鬥法，近排少有咁有戲味嘅劇集出現，如果拍現代版嘅《金枝慾孽》，可觀性都好大。」
電影《2046》喺香港推出咗四張海報，個個主角都有喺海報度亮相，獨欠特別客串嘅張曼玉，有傳言話張曼玉根本就冇影到海報。澤東電影公司為咗澄清呢個傳聞，於是喺戲院入面貼咗有張曼玉嘅海報。
大生銀行董事局主席馬清偉今年八月凌晨喺灣仔告士打道駕駛私家車時，交通警員發覺佢揸得唔係咁穩定，即刻上前截查同埋幫佢做吹波波測試，結果佢被驗出血液酒精濃度超出法定標準。馬清偉噚日就喺東區裁判法院承認醉酒駕駛，被判罰款五千蚊同埋停牌三個月。 案件編號：ESCC4396/2004
